Kon dunay katalagman

Kon aduna gani mahitabo nga trahedya ug katalagman, adunay mga tawo nga malipay. Kini sila mao ang mga badlongon sa katilingban nga walay laing tinguha gawas sa paghatag og puwerhisyo sa ilang isigkatawo.

Sama pananglit niadtong nahitabong landslide didto sa Luzon niadtong miaging tuig ug sa nahitabong trahedya sa lungsod sa Mabini sa lalawigan sa Bohol diin dul-an sa katloan ka mga bata ang nangamatay human nakakaon sa maruyang balanghoy nga gituohang nasagolan og pesticides.

Sa mga panghitabo god nga ingon niini, adunay daghang mga pundok nga mopahigayon og fund-raising campaign alang sa mga biktima sa katalagman. Adunay mangolektag hinabang o relief goods -- bisan unsa lang basta mapahimuslan sa mga biktima. Lakip ang mga estasyon sa telebisyon, radyo ug mga pamantalaan molusad sab og ilang linain nga fund-raising campaign.

Kining maong kalihokan sakyan usab dayon sa mga badlongon sa katilingban. Ang ilang estilo mao ang pagdala sa ngalan sa usa ka partikular nga kapungonan (bisan wala silay koneksiyon niini) aron pagpasalir sa ilang modus operandi. Maglusad sab (kunohay) sila og fund-raising campaign.

Ang ilang estilo mao ang pagsum-ok sa mga lugar nga walay nakaila kanila. Mangolekta silag hibabang. Kasagaran diha ngadto sa tulo ka tawo ang maghimo niini. Dili modawat kon pagkaon o used clothing ang imong ihatag. Kuwarta gayod ang pangayoon. Magdala silag sobre nga maoy ilang itunol sa tagbalay nga ilang matukmaan.

Ibabaw sa sobre nahisulat (computerized) ang ngalan sa usa ka pundok nga mao (kunoy) nagpasiugda sa fund-raising campaign. Aduna pay teksto gikan sa Bibliya nga mabasa ibabaw sa sobre, naghisgot bahin sa kaanindot sa hiyas sa paghatag. Maong malukmay gayod ang tagbalay ug mohatag og hinabang.

Wala lamay kasayoran ang tagbalay nga kadtong nangolektag donasyon mga mangingilad ug dili konektado sa bisan unsang kapunongan. Aron seguradong dili kamo mailad sa ingon niining estilo sa modus, sutaa una kon ang pagpangolektag donasyon usa ba ka lehitimong kalihokan ug kon gipasiugdahan ba kini sa lehitimo usab nga pundok o kapunongan.

* * *

(Sumbong ug reklamo? Text sa 0910-8105522)