Mga badlongon sa katilingban

Matag adlaw makadawat kitag mga text messages gikan sa nagkadaiyang magbabasa niinin lindog aron pagsumbong sa ilang kasinatian bahin sa ilang pagkabiktima sa mga badlongon sa katilingban. Ang uban dili kaayo maayong pagkasaysay maong dili nako mahatagan sa pagtagad.

Usa sa gireklamo mao kining giingong swindler ug mga mangunguot nga naglihok diha sa Private Riverside. Daghan na kuno ang nabiktima niining maong mga badlongon sa katilingban. Gitaho kini kanato sa texter nga tag-iya sa cellphone number 0921-8319611. Sa akong pagsabot sa text sa maong texter, morag nagduda siya nga suportado ang maong mga badlongon sa usa ka polis.

Laing gisumbong dinhi sa atong lindog mao ang mga badlongon sa katilingban nga naglihok diha sa dalan Escario ning dakbayan sa Sugbo. Usa sa nabiktima niini mao ang texter nga tag-iya sa cellphone number 0920-5759002. Maayong mabadlong kining mga tawhana aron dili na sila makapuwerhisyo sa mabuot nga mga lungsoranon. Lainlain kuno silag modus operandi.

Hangtod usab karon padayong gireklamo ang modus operandi ni Mr. Magtanong. Sumala sa nagsumbong kanako nga tag-iya sa cellphone number 0920-6148132, kon dili magpasalir sa iyang modus operandi kining maong tawo diha sa may Juan Luna dapit sa Unitop, adto kini sa Carbon, sa may Calderon St.

Lain pa gyong gireklamo mao ang mga mangunguot diha sa dalan Leon Kilat eskina N. Bacalso Avenue. Daghan nag tawo kanang dapita karon tungod kay anaa man diha ang luho kaayong E-mall. Pero nunot sa pagdasok sa mga tawo nga mohugop sa maong dapit, misiaw usab ang mga badlongon sa katilingban sa kadalanan duol sa maong establisamento. Misugyot ang atong texter nga tag-iya sa cellphone nunber 0916-6480966 nga maayong pabutangan og polis kanang dapita hangtod ngadto sa Abellana kay daghan na ang nabiktima sa mga badlongon sa katilingban nianang dapita.

Hinuon, usa ka higayon nakalabay ako nianang dapita nakita ko nga may polis nga nagposte diha. Pero ambot kon permanente ba kaha kini. O ba kaha ang mga polis ra usab ang bantayan sa mga badlongon. Pag-amping gyod kamo sa inyong paglakawlakaw sa mga dapit nga akong gihisgotan.

* * *

(Sumbong ug reklamo? Text sa 0910-8105522)