Budol-budol pa gyod

Daghan na kitag nahisgotan nga modus operandi sa grupong Budol-budol Gang. Hinaot nga inyong natiman-an ang tanan. Karon, ania na usay lain pa gyong modus sa Budol-budol nga akong ibutyag ug ipahibalo kaninyo aron kamo makabantay ug dili mailad niining mga tawhana.

Adunay estilo sa modus sa Budol-budol nga mao gayoy pilion nga biktimahon ang mga negosyante. Motaak kini sila dili lang sa mga dakbayan, kondili lakip na sa kalungsoran ug kabaryohan.

Ang estilo sa ilang approach ngadto sa ilang prospect mao ang pagpaila nga mamalitay sila og mga hayop sama sa baboy, baka ug uban pa. Mopatuo sila nga aduna silay sakyanan nga lantsa nga nagdunggo sa usa ka partikular nga dunggoanan, depende kon asang dapita sila mangilad. Ang maong sakyanan sa kadagatan mao kuno ang kargahan sa pinalit nilang mga hayop.

Kon sa ilang pagtuo misalig na ang prospek sa ilang gisulti, buladahon nila kinig maayo. Unya mohangyo kunohay sila nga magpatabang aron makapalit og daghang mga hayop sama sa baboy, baka, kabaw ug uban pa. Motanyag sila ngadto sa prospek og dako nga komisyon aron gayod masulod kini sa ilang laang.

Sagad usa ka babaye ug duha ka lalaki ang maghimo niini. Aron gayod mosalig pag-ayo ang ilang prospek, ila kining pakit-on sa usa ka bag nga puno sa kuwarta. Ilang ipasalig ngadto sa prospek nga human sa pinalitay, ihatag dayon nila ngadto niini ang komisyon nga ilang gisaad o gikasabotan.

Maong mosugot ang prospek. Motabang siyag pangita og mga hayop nga mapalit sa mga suspek. Apan sa dili pa sila manlakaw, mosulod una sila sa restaurant ug mangaon. Busgon nilag maayo ang prospek. Papilion nila kini sa pagkaon nga gusto niini ug sila ang mobayad.

Human sa pangaon, ang usa sa mga suspek mohangyo nga mohulam unag kuwarta sa prospek. Ilisan lang kuno siya (ang prospek) dungan usab sa paghatag nila sa iyang komisyon kon makapalit na silag mga hayop. Dako nga kantidad ang hulamon sa mga suspek. Pero mosalig lang gihapon ang prospek kay siya man ang pagguniton sa bag nga napuno sa kuwarta.

Kon makahatag na ang prospek, mananghid ang tulo ka suspek nga molakaw una kay adunay paliton. Ibilin nila ngadto sa prospek ang bag nga puno sa kuwarta. Ila kining pahimangnoan nga dili gayod molakaw kay mobalik dayon sila. Apan maabtan na lang og siyam-siyam, dili na gayod mobalik ang tulo ka suspek. Ug ulahi nang madiskubrehan sa prospek nga kadtong sulod sa bag pulos ginunting nga papel nga gipaibabwan og pipila ka tinuod nga kuwarta. Nailad siya. Pastilan...!

(Sumbong ug reklamo? Text sa 0910-8105522)