Mga drayber manukol

Wala malisang ang mga drayber nga nagbiyahean sa Mandaue nga pangdakpon sila ugma ug tanggongon ang ilang mga sakyanan kon mopadayon sila pagbiyahe dinhi sa dakbayan sa Sugbo.

Si mayor Tomas Osmeña mimando nga ipa-impound gayod ang mga PUJ nga nagpanawan sa mga rota gawas sa syudad sa Sugbo kon masakpang mamasahero sa kadalanan ning dakbayan, ilabi na diha sa Osmeña boulevard.

Apan ang hulga ni Osmeña gikataw-an lang ni Antonio Pogado, ang chairman sa Nagkahiusang Drayber sa Sugbo (Nadsu). Matud ni Pogado nga mopadayon sila sa pagbiyahe og mibahad nga posibleng may kagubot gayod kon tumanon sa Citom ang bahad sa mayor.

Husto baya si Pogado. Dunay mga basihanan ang pag-impound sa usa ka sakyanan ug wala tingali malakip ang paglapas lang sa usa ka ordinansa.

* * *

Si Koronel Vicente "Vic" Loot, ang mibalik nga provincial director sa kapolisan sa Sugbo, mipasalig gayod nga paspasan na usab niya paghimo og kampanya ang mga illegal nga sugal sa iyang hurisdiksyon.

Naglaum ko nga tumanon gayod ni Koronel Loot ang iyang gipasalig, ilabi na nga dungan sa iyang pipila ka buwan nga pagkahanaw, mipahimulos ang mga tigpasiugda sa illegal nga sugal diha sa kalungsuran.

Makapaabot na usab kita nga pipila ka adlaw gikan karon, dunay mga hepe sa kapolisan nga mag-atubang og imbistigasyon tungod sa kahaguka nila mopahigayon og kampanya batok sa illegal nga sugal sa ilang dapit.

Unya kay mibalik na man si Koronel Loot, ato siya nga awhagon nga sutaon niya kon unsa nay gisangpotan niadtong gimando niya nga imbistigasyon kaniadto.

Ang kuyaw lang kon hatagan na lang sab og higayon ni Loot ang mga hepe nga hingtungdan nga makorehean ang ilang kapakyas.

Kinahanglang bawi-on ni Koronel Loot ang kapakyas sa miaging provincial police director pagpahigayon og paspas nga kampanya sa illegal nga sugal sa kalungsuran.

* * *

Nakadawat ko og reklamo sa higala nako nga si Jonjie Gonzalez, usa ka lumulopyo diha sa Singson Village, Guadalupe.

Siya ug ang iyang mga silingan nangreklamo tungod kay wala gayod kuhaa ang basura sa ilang dapit pipila ka adlaw na ang milabay. Ngano man? Nadaut na sab ang garbage truck sa Guadalupe? Bitaw si Konsehal Bob Gabutan mipasabot nga kagahapon pa g'yod makabalik pagdagan ang ilang usa ka garbage truck.

Grabeha uy, mga usa ka semana na nga wala makuha ang mga basura sa taga Singson Village. Kon ibutang nato nga may garbage truck nga maguba, gahini usab tawon og higayon uy nga makuha ang ilang basura.

Bisan ug "every other day" lang god. Grabe na usab kaayo kon nag-upat ngadto sa lima ka adlaw, ilabi na og moabot na og semana nga dili ninyo kolektahon ang mga basura.

Ingon niini ang paagi. Kamong mga opisyal sa barangay kon pananglit maguba ang inyong mga trak sa basura, pahibaw-a ninyo ang monitoring section sa Department of Public Services.

Pangitaa si Vicente "Bimboy" delos Santos og itug-an ang inyong problema kay mipasalig man siya nako nga tabangan kamo pagsulbad sa problema. Kon dili siya makatabang, sultihi ko kay akong sukmatan si Bimboy.