Tungod sa kadanghag sa pipila ka kawani sa maong tambalanan, gibayran nila ang mga tambal nga nakuha sa mga mapahimuslanon sa higayon gikan sa botika nga accredited sa Vicente Sotto Memorial Medical Center.
Ang pipila sa atong mga kongresista dinhi sa Sugbo, nagbutang og pundo nga salapi diha sa VSMMC nga gikan sa ilang Priority Development and Assistance Funds aron kapahimuslan sa mga kabus nga lumulopyo sa ilang tagsa-tagsa ka distrito.
Apan gikauyonan nga kon ang gikinahanglang tambal sa usa ka pasyente wala diha sa pharmacy sa ospital, mahimo kini nga adto kuhaon sa botika nga nahimutang atbang ra sa ospital ug ang botika na maoy mosukot sa bayad gikan sa ospital.
Apan dunay mga tawo nga abtik kaayo mohimo og binuang. Naghimo-himo kini og mga dukomento nga kunohay gitugotan na sila nga makakuha og tambal sa botika.
Ang paagi mao nga ang tagdumala sa botika mokuha gikan sa tawo nga mopalit og tambal sa prescription gikan sa doktor, sa dukomento nga giaprobahan sa social worker ug sa staff sa kongresista nga nagtugot pagkuha sa tambal.
Kon daghan na ang mga matigum nga prescription, ang tagdumala sa botika moduso na sa mga dukomento ngadto sa kadagkoan sa tambalanan aron mabayran ang kantidad sa mga tambal nga nakuha sa mga pasyente.
Ang mga tambal nga nakuha sa mga mapahimuslanon gipatuo nga gidapat sa mga pasyente nga konuhay nagkinahanglan og tabang kay sila mga kabus. Apan kay wala lagi mabantayi ang binuang, ang daghang mga tambal nga nabinuangan lang miabot og kapin sa tulo ka milyon ka pesos. Ang dakung pangutana kon nganong gibayran man sa mga opisyal sa VSMMC ang mga bayranan nga gisingil sa tagdumala sa botika nga unta wala man makompleto ang supporting documents? Pagkadaghang kwestyonable sa mga supporting documents?
Ang pipila ka doktor sa VSMMC miingon nga gisundog lang ang ilang mga pirma diha sa prescription forms. Apan dunay ubang transaksyon nga gibayran gihapon sa mga kawani sa VSMMC bisan og walay prescription.
Misuway pagpangatarungan ang kadagkoan sa VSMMC nga dili kuno "expert" ang ilang kawani nga moila sa mga sinundog lang nga pirma sa mga doktor. Apan nganong ang uban nabayran man gihapon bisan wala g'yoy prescription?
Dunay napulo ka tawo nga nakakuha og anti-rabies vaccines nga nagkantidad og P100,716 bisan og ang doctor's prescription kon resita sa tambal walay ngalan sa pasyente ug wala usa'y license number sa doktor nga nagpirma.
Swerte ang akong higala nga si Kongresista Raul del Mar kay matud niya, ang iyang pundong-salapi gikan sa iyang PDAF nga gibutang diha sa VSMMC wala maapil sa nasakiyo sa mga kiriwan.
Apan bisan pa og gibutyag ni Kongresista Del Mar - basi sa pamahayag sa kadagkoan sa VSMMC - nga wala mabinuangi ang iyang pundo sa PDAF nga gibutang sa tambalanan, pabor siya nga dunay imbistigasyon nga ipahigayon mahitungod niining maong binuang.
Tukma kaayo ang sugyot ni Del Mar nga apilan og sakop sa media ang pagamugnaon nga fact finding team basi sa sugyot sa Commission on Audit.