EDITORYAL - Suportahan ta ang SEA Games

Dakong pagpasalamat sa Cebu SEA Games Organizing Committee (CebuSoc), pinangulohan ni Jonathan Guardo, tungod hinabang pinansyal nga gihatag ni Presidente Gloria Arroyo ug sa Philippine Sea Games Organizing Committee (PhilSoc) aron sa pagseguro nga magmalampuson gyud ang Cebu hosting sa pipila ka mga SEAG events.

Ang P10 milyones nga gihatag sa Presidente ug PhilSoc gipangayo sa CebuSoc alang sa pagpaayo sa mga games venues ug sa actual staging sa unom ka SEAG events dinhi.

Matud ni Guardo naa pay daghang hikayunon ang CebuSoc apan kining P10 milyones nga hinabang gikan sa gobiyerno nasyonal makatabang gayud og dako sa ilang (CebuSoc) pagpadalig sulbad sa mga problema nga nagkinahanglag pinansyal nga solusyon.

Ang maong kantidad mikompleto na sa P15 milyones nga budget diin ang dakbayan sa Sugbo mihatag og P3 milyones ug ang pribadong sektor mitunol sab og P2 milyones.

Nagtuo ang kadaghanan nga ang CebuSoc magmalampuson sa tinguha niini nga ang mga duwa nga gitakdang ipahigayon dinhi anay'ng ikapasigarbo sa mga Sugbuanon nga sila aduna say kahibalo sa pagduma og dagkong international sportsfests.

Mihatag kamig positibong tubag sa hangyo sa CebuSoc nga suportahan sa katawhan ang SEAG nga ipahigayon dinhi sa Sugbo sa dili madugay. Ug amo sang awhagon ang publiko sa paghatag sa ilang moral support kun dili man gani sila makahatag og pinansyal nga tabang.