Paborito ni Alix

Si Cebu City Councilor Christopher Alix, tsirman sa Committee on Health sa Cebu City Council, inay mauwaw sa pagkabisto sa iyang pagwaldas sa kuwarta sa Sugbuanong mga magbubuhis sa kampanya batok sa dengue, padayong nagpaugat. Niinsistir siyang epektibo ang iyang paboritong mga mga kemikal ug nga wa mausik ang kuwarta nga gigasto sa taphaw niyang panagang sa dengue:

o Ang kemikal tinuod gyod nga makapatay sa mga lamok; ug

o Ang fogging ug mist spray machines wa mausik kay gigamit gikan sa buntag hangtod sa hapon gikan sa Lunes hangtod sa Sabado.

* * *

Si Alix usa ka dentista, dili eksperto sa tropical infectious diseases. Samtang makapangangkon nga siyay labing suhito sa bag-ang, di siya makalalis sa tinuod nga mga doktor nga nagtuon sa dengue, kinsa niingon nga ang kemikal pikatan lang sa mga lamok nga sayon rang makabalhin sa laing lugar ug, kon matsambahan mang dagkong lamok, magpabiling buhi ang mga itlog.

Ug bisan pa kon 24 oras kada adlaw ug pito ka adlaw kada semana pa nga gigamit ang mga makina nga gitubilan sa iyang paboritong kemikal, kay mahadlok mang mga kawani sa Cebu City Health Department nga binabuyon niya og kasaba kon mosukwahi sa iyang kamahigugmaon sa mga kemikal, mas epektibo gihapon, gawas nga way minilyon ka pesos nga mausik, ang pagyabo sa nagpondong tubig ug pagpangitag lutsanan sa nabara nga mga kanal.

* * *

Kon may delicadeza si Konsehal Alix, nganong gitugotan man ang Colonie Enterprises, iyang paboritong supplier sa iyang paboritong kemikal, ang MaxiFog, nga maoy nibangka sa makabusdik nga paniudto sa tanang health inspectors nga gitapok sa Cebu City Health building niadtong Biyernes?

Kon may uwaw si Alix, nganong wa man siyay kukaikog nga niawhag sa health inspectors pagpaspas og gamit sa mga kemikal? Gikuwangan ba lang sa manok ug pansit nga gisukad sa supplier? O naghigwaos na sab sa iyang paboritong bisyo, ang pagpangompra sa iyang paboritong kemikal?

* * *

Di na maihap ang mga bulilyaso ni Alix sa iyang pagduma sa Committee on Health. Giprotestahan siya niadto sa mga doktor sa Cebu City Medical Center tungod sa kaguliyang nga niulbo sa iyang pagpanghilabot pagduma sa ospital. Si Alix man gani ang gitumbok nga usa sa hinungdan sa masuk-anong hulga ni Cebu City Mayor Tomas Osmeña pagsera sa CCMC.

Diriyot sab siya ikasumbagay sa dakong opisyal sa City Health niadto nga nisalikway sa iyang pagsuway pagdiktar unsay mga programa nga ilusad ug, nakatag-an mo, unsay mga sangkap nga komprahon.

Nganong padayon mang gisaligan si Alix pagpangu sa Committee on Health? Hinaot nga tungod lang kay way laing doktor sa konseho. Ug dili tungod kay maayo siyang namahin sa mga premyo sa iyang paboritong mga "bulilyaso."

* * *

Email: [email protected]