Ang lider sa Supreme Council of Datus Alimaong nga si Engr. Roderick Sumatra miingon nga ilang tabangan ang mga biktima sa pagpamatay. Dalaygon kaayo ang tinguha sa maong grupo kay nagpakabana sila sa mga biktima.
Dihang gisukna si Sumatra ni Banat reporter Darrel Carumba kon wala ba sila malisang nga posibleng masuko kanila ang giingong mga sakop sa vigilantes, si Engr. Sumatra miingon nga wala sila mahadlok.
Ang rason ni Sumatra nga dili sila mahadlok mao nga duna usab kuno sila'y armas. Daghan kuno sa mga 200,000 nila ka sakop dinhi lang sa Sugbo ang naghupot og lisensyado nga armas.
Pastilan. Kon toohan nato si Sumatra nga daghan sa ilang mga sakop ang dunay armas, unya pulos kuno mga lisensyado, makita unta kini sa rekord diha sa firearms and explosives section sa Camp Sergio Osmeña.
Ang Sugbo usa ra ka probinsya sa Visayas. Dinhi sa tibuok Kabisay-an wala makaabot og 200,000 ang mga licensed firearm holders. Sa ato pa, kataw-anan ang pamahayag ni Sumatra.
Ambot kon gi-unsa kaha ni Engr. Sumatra kadtong usa ka "Engr. Sumatra" nga nagpuyo diha sa Nivel Hills sa Lahug nga ang panimalay gironda sa mga sakop sa National Bureau of Investigation kaniadto og nasakmitan og pwerteng daghana nga mga armas.
Wala pa kaayo ko makakuha og konpirmasyon, apan kon wala ko masayop, kadtong naronda sa mga sakop sa NBI og nasakmitan og daghang mga armas susama usab kaniya og first name.
Ang maong engineer nga ang panimalay naronda sa mga NBI agents, pangulo kaniadto sa grupo nga ang mga sakop miila ni Dr. Jose Rizal nga maoy ilang "Ginoo." Ang mga armas nga nakuha gikan sa mga sudlanan sa kabtangan sa mga sakop sa maong kahugpungan, walay mga lisensya.
Nahadlok ko nga basin og sulti ra ni Sumatra nga armado ang iyang mga sakop kay ang statistics sa kapolisan sa mga license firearm holders dinhi sa Sugbo dili man mosuporta sa iyang pangangkon nga kadaghanan sa 200,000 niya ka sakop dunay lisensyadong armas.
Ang ako lang bahin og tungod sa iyang pamahayag nga alkontrahan nila ang mga vigilantes, mamalit na lang hinoon og paltik nga armas ang iyang mga sakop aron pagtuman sa iyang tinguha.
Akong klarohon nga wala ko'y kaila sa giingong mga vigilantes apan dili lang ko gusto og "lahap" nga mga sulti kay mahambugero ta ana. Dili sayon ang pagamit sa armas, ilabi na kon wala mag-agi og seminar sa firearm handling ang usa ka tawo.
Kon walay kasinatian ang usa ka tawo nga mogamit og armas, magkahulogan kini nga makahatag siya og kakuyaw sa uban ug angay sila nga dakpon.Kining mga tawo nga walay lisensya ang ilang armas, wala sila masuheto kon kanus-a angay'ng gamiton ang armas.
Hilig usab sila manghambog sa ilang mga armas.