Limang barangay huwaran sa pamamahala ng basura (Unang Bahagi)

TAG-ULAN na naman at tiyak na magbabaha sa Kamaynilaan. Maliban sa talagang mababa ang maraming lugar sa Metro Manila ay malaking dagdag sa problema ang maling gawain sa pagtatapon ng mga basura.

Ang problema sa basura ay isa marahil sa pinakamalaking suliranin sa mga urban centers. Ito ang dahilan kung bakit isinabatas ang Republic Act 9003 o ang Ecological Solid Waste Management Act. Ang batayang naglalayong magbigay ng maayos na pamamahala sa basura. Ang mga lokal na pamahalaan ay may mahalagang papel sa batas na ito.

Alinsunod sa batas na ito, ang DENR ay naglunsad ng patimpalak para sa mga barangay na may magandang sistema sa pamamahala ng basura. Limang barangay ang napiling katangi-tangi sa kanilang maayos at magandang kampanya sa basura sa pamamagitan ng pagpapalaganap ng tamang pagbubukod ng mga basura, pagre-recycle at iba pang sistema. Ito ang katangian ng limang barangay na nararapat lamang na tularan: Ang Bgy. Linomot sa Jones, Isabela; Bgy. Panoypoy sa Calbayog City; Bgy. Holy Spirit sa Quezon City; Bgy. Bued sa Calasiao, Pangasinan; at Bgy. Sta. Cruz sa Sto, Tomas, Batangas.

Napili ang limang barangay dahil sa katangi-tanging sipag at tiyaga, at pagtutulung-tulong ng mga residente.

Ang mga barangay na nabanggit ay pinarangalan bilang mga modelong barangay sa pambansang patimpalak para sa mga barangay na maayos na ipinatutupad ang tamang pangangasiwa ng basura. Ito ang mga barangay na katangi-tangi sa kanilang pagsunod sa Republic Act No. 9003.