Pahuwam nga walay kolateral

Karong panahona daghan sa atong kaigsoonan ang nakapahimulos sa serbisyo nga gitanyag sa mga lending investors. Adunay lehitimong lending investors apan aduna usay dili. Maayo kon sa lehitimo nga lending kay rehistrado kana ug dili mangilad. Ang uban nangutang sa 5-6 sa mga Turko.

Ang pagpangutang o pagpanghuwam og kuwarta sa mga lending maoy daling kadangpan sa sama kanakong purdoy sa higayon nga maapiki na ang bulsa sa kuwarta. Pero bantayanan usab ang pagpanghuwam tungod kay adunay uban karon nga gihimong modus operandi kining maong sistema.

Ang estilo mao nga adunay usa ngadto sa tulo ka tawo nga motaak sa mga dapit nga walay makaila kanila. Manuktok sila sa kabalayan ug magpaila nga mga ahente sa lending kon pautang. Motanyag sila sa pagpahuwam og kuwarta nga walay kolateral. Mopahuwam pod sila sa usa ka tawo gikan sa usa ka libo ngadto sa P50,000.00. Unya wala pa gayod ing deadline sa pagbayad sa utang.

Nindota, no? Mao nga daghan gayod ang madani niini. Kinsay dili nga wala nay kolateral, wala pa gyoy tagal sa pagbayad sa utang. Bahalag maabtan og pila ka tuig, okey lang. Gituyo kuno ang ingon niining pamaagi kay nasayod silang maglisod gayod pagbayad ang mga tawo sa utang. Kay nangutang man gani aron makakuwarta. Maayo gyod sila mobulada, no?

Unya, sa higayon nga mopakitag interes ang ilang prospect nga mangutang, buladahon gyod kini nilag maayo. Ila kining pasabton nga sa matag P1,000 nga hulamon, mangayo sila og P100.00 nga ilang kolektahon dihadiha. Pero duna silay promo. Pananglit mohulam kag P5,000.00, ang imong bayran P100.00 ra gihapon. Pero kon molapas na sa P5,000.00, laing P100.00 na usab ang ibayad.

Maong daghan ang madani sa ilang tanyag. Daghan ang mangutang. Kolektahon dayon nila ang P100.00 ug may aplikasyon nga papil-apan sa prospect. Ila kunong iduso ang maong mga application form ngadto sa ilang opisina ug maghulat na lang ang mga prospect sa ilang tawag. Aron gayod kaha mosalig ang mga prospect kanila, magbilin pa silag calling card (props lang).

Apan human niadtong hitaboa, dili na gayod mopakita ang maong mga tawo sa inyong dapit. Kay dili man tinuod nga mga ahente sila sa pautang nga walay kolateral. Busa sa higayon nga makasugat kamog estilo nga ingon niini, sutaa una kon lehitimo bang lending ang nagpautang. Kon dili, ayaw dayon pagkubit.

* * *

(Sumbong ug reklamo? Text sa 0910-8105522)