Palpak nga Ceset

Tungod sa kakuwang og kahibawo sa mga kawani sa City Hall nga gitugyanan pagpanakop sa mga tawo nga magpataka lang og labay sa ilang mga basura, malagmit nga mausik ra hinoon ang ilang kahago.

Abi ninyo og ngano? Maisip nga wala g'yod maplansa pag-ayo ang mga gimbuhaton hinungdan nga naglisud sila pagpasaka og kaso sa mga naisyuhan og citation tickets human masakpi nga nagpataka og labay sa ilang basura.

Sayonan ka, mipasaka ang City Hall og kaso batok sa 38 ka tawo apan gibalik kini sa fiskaliya kay unsaon nga wala may kompletong address ang mga gipasakaan og kaso.

Si Engr. Sammy Dy nga maoy pangulo sa City Environment Sanitation Enforcement Team (Ceset) mihatag og ehemplo nga gibutang ra didto sa complaint nga ang dinakpan nagpuyo sa V. Rama Avenue.

Lisud tinuod kaayo alang sa mga fiskal ang pagpadala og summon sa mga gipasakaan og kaso. Ang laing problema mao nga dugay kaayo nga makit-an pagbalik ang mga apprehending officers aron sila makapirma og affidavit.

Ang akong nahadlokan mao kini. Ang pagpataka og labay sa mga basura maisip ra nga "light offense" og ubos sa Article 90 sa Revised Penal Code dili na mahimo nga ang mga dinakpan kapasakaan og kaso iniglapas sa duha ka buwan.

Gikan niadtong Hulyo 1 hangtod kagahapon, ang mga naisyuhan og citation tickets tungod sa pagpataka'g labay og mga basura miabot na og 2,715. Sa maong gidaghanon, 235 lang ang boluntaryo nga mimulta og tag P500.

Kon imong hinuktokan pag-ayo, ang gidaghanon sa mga mibayad og multa ingon man ang kapin pa lang sa 20 nga napasakaan og kaso, wala gani makatunga sa kapin sa 2,715.

* * *

Tungod sa atong mga sugyot, ingon sa mahimoan na og kausaban ang mga pamaagi diha sa Cebu City prosecutors office aron pagsiguro nga ang mga ebidensya sa kaso madeposito gayod ngadto sa evidence custodian.



Nasuta man god nako nga dunay mga bilyako nga mga tinugyanan sa balaod nga human sa ipahigayong inquest proceedings, dili motuman sa mando kanila sa fiskal nga ang mga armas ug ubang ebidensya ideposito sa evidence custodian.

Karon, si city prosecutor Nicolas Sellon mimando na sa iyang mga assistant prosecutors nga sa dili pa mahuman ang pagpahigayon og inquest proceedings, ipadeposito g'yod sa mga polis ang ilang ebidensya.

Agi og pagmatuod, inigbalik nila ngadto sa fiskal, ipakita nila ang resibo nga gikan sa evidence custodian.

Abtik man kaayo ang ubang polis. Abi kay human na man ang inquest proceedings, dili na nila ideposito ang armas, adto ra kini kanila. Kon mahitabo nga madismiss o makonbikto ang mga akusado, aw ang armas naa ra kanila.

Sa pagpanglabay sa katuigan, ang armas takulahaw lang nga mangahanaw. Ang maayo tingali, mohimo og imbintaryo ang mga evidence custodian sa korte ug fiskaliya kon unsay mga ebidensya nga anaa pa kanila.

Ako gikuyawan nga ang nahitabo didto sa MTC sa Dasmariñas, Cavite nga nangawala ra ang ubang ebidensya, basin nahitabo usab kini dinhi sa Sugbo.