EDITORYAL Magbaklay na lang kita!

Pagsugod na kamo'g baklay!

Mao kini ang awhag ni Pres. Gloria Arroyo sa mga Pilipino nunot niining walay puas nga pagpa-usbaw sa presyo sa petrolyo atol niining iyang kontrobersiyal nga administrasyon.

Ang Shell ug Caltex nagpa-usbaw og dugang 50 sentimos kada litro sa presyo sa gasolina. Gikatakdang mosunod pagpa-usbaw ang Petron.

Mosamot kamahal ang mabayran sa mga motorista kun ipatuman pagbalik ang expanded value-added tax nga 10 porsiyento matag pump price sa gasolina kay pananglit P33.90 ang matag litro, mopuno ka og 3.39 para sa e-VAT. Sa ato pa, 37.29 matag litro ang mabayran sa motorista. Sa imong P100, 2.68 litros ra gyud ang mapalit nga gasolina.

Wala magkomedya ang presidente sa iyang awhag pagpabaklay kanato o paggamit na lang og biseklita sa atong mga lakaw. Gani, si Press Secretary Ignacio Bunye nagkanayon nga sugdan sa Malacañang ang pagdaginot sa petrolyo.

Bisan nagtuo kita nga malisud matuman ang awhag sa presidente tungod sa katapulan sa mga Pilipino nga magbaklay o magtindak sa pedal sa biseklita, nangita nato nga nakahibalo diay ang presidente sa dautang epekto sa padayong pag-usbaw sa presyo sa petrolyo ngadto sa mga yanong lungsoranon.

Alang nato, ang gobyerno lamang ang nasayod unsay angayan buhaton niini. Unsaon man, nag-ayo lang ang pagarpar sa gobyerno nga andam na kining mosagop sa mga indigenous sources sa fuel sama sa biogas o liquefied petroleum gas (LPG) nga mas daginot kay sa gasolina o krudo, apan wala gyuy gibuhat.

Maayong buhaton sa gobyerno ang pagbubo og puhonan aron ang Department of Energy magsugod na og pamuhat og mga converter, aron kadtong mga makina sa sakyanan nga pampublikong transportasyon mahimo nang mogamit og LPG. Sa ingon, mobarato ang pletehan.