Molili dayong lakaw

Nakadawat akog taho gikan sa lainlaing magbabasa nga misumbong kanako mahitungod sa usa ka tawo nga ilang gikatingad-an sa ilang lugar. Wala sila makaila sa maong tawo. Nakapahinumdom kini kanako sa nahitabo didto sa Tagbilaran City.

Natahap ang nag-text kanako nga usa kini ka estilo sa modus operandi sa mga badlongon sa katilingban. Nagtuo silang espiya sa mga kawatan ang maong tawo. Kadudahan man god ang mga lihok sa tawo nga ilang gikatingad-an.

Ang estilo sa maong tawo mao nga magsubay siya sa kadalanan aron pagpamaligya og balut. Magdala siyag basket ug sa matag karon ug unya magpaninggit og: "Balut! Balut mo diha! Balut...!"

Gawas niini, molili usab siya sa sulod sa kabalayan aron ihanyag ang iyang baligya ngadto sa tagbalay. Apan sa higayon nga maduol na kaniya ang tagbalay, modiretso siyag lakaw. Mao nga gikahibudngan pag-ayo kining maong kalihokan sa maong balut vendor (kuno) ilabi na nga wala gayoy nakaila kaniya.

Mao nga kadaghanan sa mga tagbalay nga nakasinati niini nagtuo nga nag-espiya lang ang maong tawo. Hinuon, hangtod karon wala pa matino kon nalambigit ba ang maong balut vendor sa bisan unsang krimen sama sa pagpanglungkab ug pangawat nga nahitabo. Wala pa man goy record ang kapolisan nga direktang naglambigit niining maong balut vendor ngadto sa bisan unsang kaso. Busa dili pa kita makatumbok kon kakunsabo ba gayod siya sa mga kawatan.

Pero labing maayo nga dili gayod kita mokompiyansa. Sa higayon nga may tawo nga mosungko sa atong panimalay aron pagpamaligya og balut apan mosibat hinuon kon duolon, pagbantay kamo kaniya. Kadudahan ang iyang lihok.

Didto sa Tagbilaran City, may gikatingad-an silang tawo nga ingon niini ang gihimo. Nahitabo kini sa Penaflor St. Gi-report dayon sa mga residente sa maong dapit ngadto sa usa ka programa sa radyo ang gikatingad-an nilang tawo.

Nakadungog kaha sa sing-al sa magsisibya, wala na mopakita ang balut vendor nga ilang gikatingad-an. Ambot kaha kon gi-report ba usab sa mga residente sa Penaflor ang ilang gikatingad-an ngadto sa kapolisan. Basta nahanaw ang gikatingad-an nilang balut vendor sukad kini nila gitaho ngadto sa usa ka magsisibya.

Usbon ko, wala pay report nga nalambigit ang maong tawo sa bisan unsang kaso. Apan pagbantay kamo kay katingad-an ang iyang lihok. Bisan tuod kon kakunsabo siya sa kawatan. Kay kon tinuod pa siyang balut vendor, nganong mosibat man hinuon siya kon may moduol kaniya aron unta mopalit sa iyang tinda? Nganong igo ra man siyang molili dayong lakaw? Kadudahan gyod, dili ba? Dili kay sa Tagbilaran ra kini nahitabo. May nag-text nako nga anaa usab kini sa ubang lugar sa Kabisay-an ug Mindanao.

* * *

(Sumbong ug reklamo? Text sa 0910-8105522)