Fund-raising?

Sityembre 24, 2004. Mao kini ang petsa sa pagkadiskubre sa mga awtoridad sa mega shabu laboratory sa dakbayan sa Mandaue.

Sityembre 24, 2005. Mao kini ang petsa nga gisaad ni Kongresista Roque Ablan kanus-a niya ipublikar ang mga ngalan sa (mga) opisyal sa lokal nga kagamhanan nga matud niya local contacts ni Tan sa iyang shabu lab dinhi.

Luoy kaayo ang mga local government officials. Maghulat pa intawon sila nga moabot ang Sityembre 24 aron ipublikar ni Ablan ang mga ngalan, basin og apil sila.

Apan ang nahibudngan nako, nganong dili man karon niya hinganlan? Nganong paabuton pa man ang Sityembre 24?

* * *

PANGUWARTA. Adunay abogado nga akong naka-estorya ug nakakomentaryo sa bahad ni Ablan: "Sayoha sad nila mag fund-raising uy! Layo pa gani kaayo ang eleksiyon."

Nakatuhog ko sa gipasabot sa abogado. Nagtuo tingale siya nga gamiton sa panguwarta ang pagpublikar sa ngalan sa mga local government officials.

Ambot og motuo ba kamo sa iyang pangagpas. Bisa'g layo ra ni maayo man usab nga atong hisgutan, kamo na lang ang mohukom kun tinuod ba kini og dili. Ang iyang pagtuo, kanang paglangaylangay og hingalan sa mga local contacts, maghatag kana og higayon nga moduol ang mga tawong nalambigit na kanhi sa drugas aron motunol og kuwarta aron dili i-apil ilang ngalan.

Nahinumdom ko, aduna koy higala nga miingon nga sa dihang gibulgar ni Kongresista Antonio Cuenco ang mga ngalan sa mga druglord sa Cebu, asawa og negosyante'g mga alahas giduol og politiko nga nangayo kaniya og kuwarta bugti sa dili pag-apil sa ngalan sa iyang bana sa listahan ni Cuenco.

Tinuod man kini o dili, ang punto nako mao nga kun hinganlan man ugaling ni Ablan kinsa kanang local contacts ni Tan, dili na lang na niya dugaydugayon pa aron mawala ang pagduda nga gamiton lamang kini sa dautang tinguha.

* * *

BOC VS CIDG. Dili na gyud tingale matapos kining panagbangi tali nila ni Cebu Customs District Collector Ma. Lourdes Mangaoang ug sa mga opisyal ug sakop sa Criminal Investigation and Detection Group (CIDG-7).

Migawas kagahapon sa mga pamantalaan ang pagdakop sa CIDG-7 sa usa ka negosyante nga si Russ Jao tungod sa matud pa pagtiner niini og righ-hand drive nga sakyanan sa iyang yarda sa Kinasang-an, ning siyudad atol sa ronda dala ang search warrant nga giisyu ni RTC Branch 5 Judge Ireneo Lee Gako Jr.

Mi-react si Mangaoang ug mibahad nga pasakaan og kasong administratiba ug kriminal si Gako tungod sa iyang pag-isyu og search warrant nga gigamit sa CIDG-7 pagronda sa yarda ni Jao.

Human na isuspenso og unom ka bulan si Gako sa Korte Suprema tungod sa iyang pagpanghilabot sa kalihukan sa customs. Nahadlok ko nga mausab napud ang pagka-suspenso ni Gako tungod ning iyang pag-isyu og search warrant.

* * *

WAY KLARO. Sa warrant nga gihuptan sa CIDG-7, ang nakabutang nga subject nga ilang konpiskahon mao ang Nissan Terrano, Mitsubishi Pajero, Toyota Surf, Toyota Land Cruiser, ug Isuzu Trooper Big Horn.

Apan wala makalista sa warrant ang Toyota MRS Sedan 2004 model.

Gidakop sa CIDG-7 si Jao ug gitanggong. Gisakmit usab ang Toyota MRS Sedan 2004 nga wala malakip isip subject sa warrant. Kagahapon, nakadawat kita og impormasyon nga gibuhian sa CIDG-7 si Jao. Ambot kaha og mopasaka ba og kasong arbitrary detention si Jao batok sa mga polis sa CIDG-7.

Sa balaod, dili maisip nga ebidensiya ang butang nga gisakmit sa mga awtoridad nga wala makabutang isip subject sa warrant. Ang maong klaseng warrant gigamit alang sa "fishing expition" (panagat) lang, sa pamasin nga makakita sila'g usa o duha sa ilang gihinganlan.

Daghan nang kaso nga gi-dismiss sa Korte Suprema tungod sa sayop nga pagkuha sa search warrant.

Nasunog na pud ang CIDG-7!

* * *

HISTORY. Duna may history si Mangaoang ug ang CIDG. Sa dihang kolektor pa sa Cagayan de Oro si Mangaoang, iyang gikasuhan sa Ombudsman ang mga elemento sa CIDG sa maong probinsiya tungod sa pagpanghilabot sa kalihukan sa adwana didto pinaagi sa pagpanakop og mga butang nga bugtong ang customs lamang ang adunay hurisdiksiyon.

Sa maong kaso, na-yawa ang mga ahente sa CIDG sa Cagayan. Migawas nga mananaug sa kaso si Mangaoang.