EDITORYAL - Kaluwasan sa mga Badjao

Ang konseho sa lungsod sa Cordova mipalabang og resolusyon pagsupak sa tinguha sa kagamhanan sa dakbayan sa Sugbo pagbalhin sa kapin sa 400 ka pamilyang Badjao ngadto sa isla sa Tonggo gikan sa ilang gipuy-an sa Alaska, Mambaling.

Gika-irita ni Mayor Tomas Osmeña ang maong resolusyon ug mibahad kini nga iyang ikonsiderar ang Cordova nga laing kaaway gawas sa dakbayan sa Talisay. Gawas pa, bakwion ni Tomas ang iyang desisyon paghatag og tres hektaryas nga luna sa South Reclamation Project nga magbalor og P300 milyones.

Kun unsa man ang rason sa mga konsehal pagsupak sa tinguha sa dakbayan sa Cordova, angayang respetohan kini. Apan nasayod kita nga dili pa sirado ang tanan. Mahimo pa nga estoryahan aron kalikayan ang panagbangi.

Na-report na dili pa lamang dugay nga ang isla sa Tonggo dili luwas sa tawo kun mo-establisar og residensiya sa maong isla. Panahon sa taob kun tingdako sa dagat, igo ra gyud nga mogimaw ang isla. Samot na kun mag-bagyo.

Kun gihunahuna man sa siyudad sa Sugbo ang pagpalayo sa mga Badjao gikan sa dakbayan, maayong hunahunaon usab nila nga dili sila mabutang sa peligro.

Bisan nasayod kita nga ang komunidad sa mga Badjao anaa kasagaran magpakabuhi sa dagat, kun mabutang man usab sila sa peligro ang hingtungdang ahensiya sa kagamhanan nga magpabaya sa ilang kaluwasan dili maka-eskapo sa layabilidad.

Mao kini ang likayan sa Cordova.

Bisan pilion sa mga Badjao ang pagpuyo sa Tonggo, apan ang kadaut nga ilang mahiaguman kinahanglan gihapon nga um-omon sa kagamhanan diin ang ilang komunidad nahisakop.