Mini nga Lacto

Dinhi sa ato daghan na kaayo ang migamit sa food supplement vitamins nga "Lactovitale". Ingon usab niini ang nahitabo didto sa kaulohan. Namatud-an man god ang kaepektibo niini maong daghan na ang migamit niini. Ug kining maong kalamboan gisakyan na sab sa modus operandi sa mga badlongon sa katilingban.

Dili pa lang dugay nasikop ang usa ka negosyanteng Tsinoy ug ang helper niini gumikan sa pagbaligya nila sa mini nga "Lactovitale" sa Sta. Cruz, Manila. Maoy ilang ipasalir sa ilang modus operandi panahon sa kagabhion. Nag-atubang na karon ang duha og kasong estafa ug pagpameko og produkto.

Pero dili kita makaseguro kon kadtong nadakpan mao ra bay naghimo sa samang modus. Mao nga kinahanglang dili gayod kita mokompiyansa kay basin may misuon na usab niining maong tinonto dinhi sa dakbayan sa Sugbo. (Simbako!) Kinahanglang magbantay gayod kita kanunay.

* * *

Niadtong Hunyo 23 gibaha akog text message kalabot sa akong gikolum nga naghisgot sa usa ka text nga nangorehir sa akong gibuhat nga pagbulgar sa lainlaing modus operandi sa mga badlongon sa katilingban. Ania ang pipila:

"Sir, usa ako sa nagsunod sa imong kolumn ug gikalipay ko kini. Kon kinsa ang gihangan sa imong gibulgar maoy nagbuhat og daotan. Ayaw kahadlok nila. Daghan ming nisuporta nimo." -- 0919-2411889

"Good afternoon, Sir Uriel. Bag-o lang ko nahuman og basa sa imong column. Sakto man ang imong gisulti or gibuhat aron aware ang mga tawo. Ako uyon sa vigilantes basta salbahis lang ang patyon." -- 0916-3803201

"Orie, padayon sa imong serbisyo publiko. Sa imong kolum sa Banat News. Ayaw pagtagad anang mga buringog og utok. Kadtong gihangan sa imong gisuwat usa to sa nagimo nimo. Ang imong kolum mao pirme akong basahon pag-una kay naay daghang pasidaan aron makabantay ug dili mailad. Busa, padayon. Kaming taga Mandaue anaa kanunay sa mga maayong hiyas ug bulawanong pagtulon-an. Salamat nga imong gishare kanamo ang imong mga kasayoran bahin sa modus." -- 0917-2415125

"Good day, Mr. Vallecera. Klaro kaayong napagan ang hambugerong texter sa imong lindog kay tingali usa siya sa may daotang modus nga gimugna dinhi sa Sugbo. Thank you. I'm Jing." -- 0919-3565854

Daghang salamat usab sa inyong pagsimpatiya kanako. Usa kini sa nakapadasig kanako nga ipadayon kining ubos kong lindog.

* * *

(Sumbong ug reklamo? Text sa 0910-8105522. E-mail: [email protected].)