Wiretapping sa Cebu

Nakadungog ko og gamay sa "wiretapped conversation" sa pipila ka tawo nga matud pa maoy mogiya kanato sa paghuna-huna nga ang kamandoan sa Department of Justice pagpa-dismiss sa kasong kriminal nga gipasaka batok sa usa ka magpapatigayon, nahimo pinaagi sa pagpanuborno.

Dili hinoon kaayo klaro, apan dunay ngalan sa usa ka abogado nga ang bansagon nagsugod sa "D" nga maoy mipahibalo sa usa ka babaye ug lalaki dinhi sa Sugbo kabahin sa kalamboan sa kaso nga kidnapping nga gipasaka batok ni Roderick Go ug ang mipasaka sa kaso mao si James King.

Nagkita kami si Cebu City prosecutor Nicolas Sellon kaniadtong miaging Lunes ug ako siyang gitug-anan kabahin sa maong "wiretapped conversation" apan matud niya nga wala na kanila ang maong kaso.

Tungod sa mitumaw nga "wiretapped conversation" nga posibleng makapaturok og pagduda sa katawhan ngadto sa pipila ka prosecutors sa DOJ, si Justice Secretary Raul Gonzalez mimando dayon og imbistigasyon.

Ang NBI maoy gimandoan niini sa paghimo og imbistigasyon. Apan ang pasangil mao nga P200,000 ra kuno ang suborno. Mora’g sa maong kantidad, dili ko makatoo kay pila ra god ang P200,000 alang sa taga DOJ kon tinuod man nga sila nagpasuborno.

Sa "wiretapped conversation" hinoon nga akong napaminawan, ang usa ka abogado nga bansagon og "D" mipahibalo adtong lalaki ug babaye nga aduna na siya’y draft sa resolusyon sa DOJ kabahin sa ilang kaso, ug ang hukom paborable alang kanila.

* * *

Sa mitumaw karon nga isyu, nagpasabot kini nga bisan dinhi sa Sugbo misiaw na kining "wiretapping" sa mga panaghinabi ginamit ang telepono.

Ang Anti-Wiretapping Act nagdili sa paghimo niining maong kalihukan, sama sa pag-record sa mga panaghinabi sa duha o subra pa nga magsultihanay ginamit ang mga himan sa kumunikasyon, nga walay pagtugot kanila.

Sa miagi natong mga lindog, atong gituki kon unsa ang mga lagda nga mahimong legal ang wiretapping.

Kinahanglan nga ang mga tinugyanan sa balaod o ang mga tawo nga mohimo og wiretapping makakombinsir sa huwes nga hatagan sila og pagtugot kay aron masakpan ang mga illegal nga kalihukan.

Ang wiretapped conversation, kinahanglang isulod og "sealed envelope" og adto patipigi sa hukmanan. Kining wiretapped conversation sa Cebu, kinsa kaha ang naghimo niini?

Kon imong tinambanon sa paghuna-huna, dili kalikayan ang pagduda nga kadtong babaye ug lalaki nga nahinabi ni "Atty. D" diha sa telepono, posibleng mga paryente kadto ni magpapatigayon Go.

Buyno, atong panid-an kay karong alas 10 sa buntag, ang mga abogado ni King magpatawag man og press conference. Ako isip justice reporter sa Freeman, giimbitar ko pagpatambong.

Nangagpas ko nga ang pamilyang King, pinaagi sa ilang mga abogado, mohimakak g’yod nga gikan kanila ang CD nga matud pa anaa ang wiretapped conversation nga naghatag og ideya nga ang hukom pagpadismis sa kaso batok ni Go, nahimo pinaagi sa suborno.