Lo-go diay

Ang akong tinubdan nagkanayon nga dili jueteng ang illegal nga sugal nga nadakpan sa mga sakop sa Criminal Investigation and Detection Group pipila ka adlaw na ang milabay.

Usa ka tinubdan nako diha sa barangay Guadalupe, miingon nga "lo-go" ang maong illegal nga sugal ug dili jueteng. Wala g'yod hinoon mahibaw-i kon kinsa ang nagpaluyo sa maong illegal nga sugal.

Kaniadtong miaging adlaw, may mipadala kanako og text message nga nagtumbok sa usa ka tawo nga taga Pasil nga kuno maoy financier sa giingong jueteng diha sa barangay Guadalupe.

Mao kadto nga basi sa ngalan nga gihatag kanako, nakontak nako ang tawo og nagkasultihanay kami sa telepono.

Ang maong tawo, miangkon hinoon nga nag-operate siya og masyaw, apan kusganong nanghimakak nga siya ang financier sa giingong jueteng diha sa barangay Guadalupe.

Kon akong timbang-timbangon, mora'g may katinuoran ang iyang gibutyag kay wala man gani siya molimod nga usa siya sa nagpadagan og masyaw dinhi sa dakbayan bisan wala ko mangutana kaniya.

Pananglit og siya pa maoy tinuod nga nag-finance sa giingong jueteng, dili tingali siya molimod.

Apan kadtong tawo nga mipahibalo kanako, gusto ko nga magka-estorya g'yod ta og hatagan ko nimo og dugang inpormasyon aron atong matimbang-timbang pag-ayo.

Basta pagka karon, basi sa akong pagtimbang-timbang, makaingon ko nga ang maong tawo walay labot sa pagpadagan og jueteng dinhi sa dakbayan.

* * *

Wala pa g'yod molihok ang mga sakop sa Cebu City Environment Sanitation Enforcement Team (Ceset) pinaagi sa pagdakop unta sa mga tawo nga magpataka lang og labay sa ilang mga basura.

Maayo g'yod nga hingusgan ang pagdakop aron matudloan og leksyon ang katawhan.

Nasayran hinoon nako nga ingon sa gihatagan og higayon ang katawhan dinhi sa dakbayan nga mag-usab sa ilang batasan hangtod karong Huwebes. Inig-Biyernes, dakop na g'yod kuno.

* * *

Awhagon nako ang kadagkoan sa Citom nga dakpon nila kining mga tawo nga mamaligya og sigarilyo, mga trapo ug newspapers nga maglakaw-lakaw diha sa taliwala sa karsada.

Nganong wala man kini sila pangdakpa? Exempted ba sila sa pagpatuman sa anti-jay walking ordinance? Husto g'yod kadtong awhag sa usa ka konsehal nga kadtong mga traffic enforcer nga dili modakop, silotan.

Ang akong argumento niini mao nga malooy kita niining maong mga tawo nga nanginabuhi sa tinarong. Apan tungod sa ilang paglakaw-lakaw diha sa karsada, mahimong makahatag sila og peligro sa mga motorista.

Maayo unta og dunay balaod nga basta kining mga tawhana madam-agan, walay tubagonon ang mga drayber sa sakyanan nga makabangga.

Naa pa'y bakol diha nga panahon sa hapon, anha magsakay-sakay anang iyang wheel chair sa dalan Manalili, ug inigka-gabii na, anha na usab sa dalan Colon duol sa Gaisano south.