Asset pusher sab?

Atensyon kadagkoan sa Philippine Drug Enforcement Agency. Susiha kuno kining report nga duna kamo'y mga "asset" diha sa Cambaro, Mandaue nga mao ra usab ang tigbaligya og shabu sa mga drug users.

Diay mga ngalan nga gihatag kanako sa usa ka lumulopyo sa maong dapit. Kon gusto mo, kuhaa ri og himoi og aksyon. Ayaw ko ninyo og ingna nga apil ni sa ilang pagka "deep penetration agent."

Sa kadugay na nako nga sakop sa media, gani ang uban ninyo wala pa mahimong polis dihang nasulod ko sa media, mao nga dili ko ninyo mailad.

Duna pa gani kuno'y tanod nga mangayo'g shabu gikan sa drug pusher kay ipasuyop sa iyang kulokadidang. Kinsa ba kining maong tanod? Kaila mo?

* * *

Dili imposible nga ang ubang tawo nga mihatag kanako og inpormasyon batok sa illegal nga drugas, mga tawo ra usab nga nalambigit niini ug ang ilang gi-report mao ang ilang gika-kompetensya.

Ako kining giklaro kay dunay daghang nangutana kanako kinsa ang akong mga informers kay ila kunong susihon ang background sa maong mga tawo. Sa ako nang gibalik-balik, bisan kamo nga nangutana kanako, dili nako itug-an ang ngalan ug mga numbers.

Ang akong saad nga protehean nako ang inyong mga "identity" ako g'yong tumanon bisan og ang mga polis pa gani ang mangutana, dili ko mohatag kanila. Dili ba diay kamo gusto ana?

Ang inyong buhaton, hatagi ko og ngalan - ilabi na g'yod sketch sa mga balay nga gipuy-an sa mga drug pushers - sama sa usa nako ka informer nga moari g'yod sa opisina nga magdala og sketch sa nahimutangan sa mga pushers nga duna g'yoy ngalan.

Mas sayon-sayon kini nga paagi kay sa igo lang kamo nga motug-an sa mga ngalan sa pushers, unya dili pa g'yod tinuod nga ngalan. Angga ray inyong gihatag.



Sa Cambaro, dunay report nga akong nadawat nga ang balay sa usa ka "Litang" ug "Garry" gigamit usab isip suyopanan og shabu sa mga drug pusher. Awhagon hinoon nako ang informer nga hatagi ko og sketch.

Sa barangay Cambaro, dunay mi-report nako nga dunay anak og konsehal nga nalambigit sa pagpamaligya og illegal nga drugas. Tinuod ba ni? Pahibaw-a kuno ko ninyo mga taga Cambaro, Mandaue.

Ako usab nga balikon, dili tanan nga text messages nga akong tubagon. Apan ayaw kabalaka kay gi-take note nako ang inyong mga messages. Tawga lang ko kon duna moy buot pakisayran, ayaw lang pagsigi og pa-miss call kay samokan ko ana.

* * *

Atensyon mga polis diha sa Waterfront nga gidumala ni Koronel Marciano Batiancila. Dunay nag-report nako Kernel nga usa ka panimalay diha sa sitio Tabay, dalan Logarta gihimong suyopanan og shabu sa mga addict.

Ako sab nga awhagon kining usa ka Tata Totin nga maayong masayod ka nga dunay imong mga silingan nga natahap nga gigamit nimo ang imong balay isip pasuyopanan sa mga drug addict. Pagka karon hinoon, dili pa ko motoo. Mga polis, susiha ninyo ni.