Angayan sa front page uy

Ang balita nag-ingon nga si Mayor Tomas Osmeña nahibulong nganong gihatagan man og prominent treatment sa front page sa mga local nga pamantalaan ang gipanulti ni Susan Roces atol sa iyang nationwide tv appearance adtong miaging Miyerkules.

Dakong balita kadto uy, Mr. Mayor. Tiaw mo bay usa ka biyuda sa usa ka tinamud nga personalidad sa pelikula kinsa kaniadto giilang mahinhin ug matud pa sa uban may pagka Maria Clara ang batasan, nagsiyagit-siyagit sa tv ug nipanamastamas sa Presidente?

Guwapa si Susan apan adtong tungora nausab ang iyang dagway sa mga mata sa katawhan nga mabuot. Mga pulong tikasan, kawatan, bakakon, arogante, ug uban pang "unlady-like" nga pulong nanggawas sa iyang baba.

Gusto gyud siyang matagak si Gloria sa pagka presidente kay buot usab diay siya mangulo sa nasud isip presidente. Sa inyong nakitang taras niining Susan, angayan ba siya mangu sa atong nasud?