Sigi lang pasanginlan

Naluoy ko sa kahimtang karon ni SPO1 Adonis Dumpit. Gawas nga gisuspenso siya sa Ombudsman tungod sa pagpusil sa duha ka tawo nga gidudahang mga dautan, gipasanginlan na usab karon nga maoy mipatay ni Joel "Tongol" Nudalo didto sa Bohol.

Ang asawa ni Nudalo nga si Janice maoy mitug-an sa mga reporters nga nailhan niya ang tingog ni Dumpit nga mitubag kaniya dihang gikontak niya ang cellphone sa iyang bana nga niadtong tungora gikuha sa mga nagpusil.

Nangangkon si Janice nga makaila g'yod siya sa tingog ni Dumpit kay dugay sila nga managsilingan diha sa barangay Tejero. Giingnan pa gani kuno siya ni Dumpit nga isunod siya sa pagpatay.

Sa pagtubag pa lang kuno sa tawo nga maoy naggunit sa cellphone ni Nudalo, iya dayong giingnan nga "Uy, ikaw man god diay ni Dumpit!."

Akong pahinumdoman si Janice nga basin hinoon og tungod sa pagdali-dali nimo og hatag sa dili konpirmado nga inpormasyon, makadaut na kini sa kaso unya.

Tingali og moabot ang panahon nga duna na g'yoy lig-on nga mga ebidensya nga magtumbok sa tinuod nga kriminal, posible nga ang dinali-dali nimo nga pamahayag makadaut na unya hinoon sa kaso.

Mao kini ang bantayan nimo Janice. Usa ka kaso nga pending pa diha sa hukmanan nakasugat karon og problema tungod sa mga dinali-dali nga pamahayag sa mga tawo nga kabahin karon sa prosekusyon.

Dili lang nako klarohon kay aron dili matataw kon unsa kini nga kaso. Apan nag-estorya mi og sa judge nga naghupot sa kaso, usa kini sa makadaut.

Ikaduha, makahimo pa kaha si Dumpit sa pag-adto sa Bohol aron lang g'yod patyon? Nganong adto man g'yod sa buwangan nga daghang tawo?

Wala malilong sa kapolisan nga si Nudalo, bisan og dunay panimalay diha sa Lapu-Lapu, apan pirmi kini nga anaa mag-estar sa isla. Kon tinuod pa nga si Dumpit ang nagpatay, giadto na lang ni Dumpit sa iyang gipuy-an.

Ikaduha, nganong si Dumpit man g'yod ang mopatay ni Nudalo? Nasayod ko nga nakapahasol g'yod ni Dumpit ang iyang pagkasuspenso og bali'g usa ka tuig. Makahuna-huna pa kaha siya pagpangita ni Nudalo?

* * *

Diay leksyon alang sa mga tawo nga kusog kaayo nga magbugal-bugal sa hukmanan, pinaagi sa paghimo'g pasangil sa mga huwes ug mga justices, panahon nga mapilde sila sa kaso.

Tiaw mo, apil si Supreme Court chief justice Helario Davide Jr. gitawag niya og "chief swindler in robes." Grabe kaayo nga pagyama-yama sa atong Sugboanong chief justice ug sa uban pang mga justices nga gihinganlan niya og mga "corrupt."

Resulta, ang Supreme Court en banc misagpa og contempt ni Aurelio I. Arrienda ug mipamulta kaniya og P20,000. Kon dili niya bayran, ipapriso siya sa labaw'ng hukmanan.

Mao kini ang silot sa mga tawo nga magpataka lang og yawyaw tungod lang sa rason nga pildero siya sa usa ka kaso. Ang gipasakaan og kaso ni Arrienda nga ang kaso miabot sa Korte Suprema mao ang Government Service Insurance System.