EDITORYAL - Politika: Tinubdan sa kagubot

"Bisan asang anggulo nimo sud-unga kining kagubot sa atong nasud karon, dili gayud ikalalis nga politika ug politika maoy hinungdan."

Kini sumala sa usa ka babayeng magtutudlo sa kolehiyo atol sa iyang pagbisita sa opisina ning Banat News adtong miaging adlaw.

"Grabe gyung politika diha sa atong kagamhanan...Bidang grabeha," ang titser nagkanayon. "Tan-awa ra gud ang mga players sa kagubot, di ba mga bangiitang politiko?"

Matud sa maestra sayud ning maong mga politiko nga sa ilang tinguhang maangkon ang dakong gahom pinaagi sa pagtumba lang ni Presidente Arroyo ilang gibutang ang nasud sa dakong katalagman.

"Unsaon ta intawon pag-abante kung naay pipila kanato ang mobira paatras sa atong nasud?" nangutana ang maong magtutudlo.

Mikompisal ang maestra nga adto siya nibotar ug gani puwerteng kampanya niya kang Fernando Poe Jr. gikontrahan na man gani kuno siya sa iyang mga silingan nga pulos GMA fans.

"But the elections are over," matud niya. "The Comelec and the high court had declared GMA as duly elected president. So, nganong di na man lang nato suportahan si Mrs. Arroyo in the name of peace and prosperity in our land."

Agree mi nga politika ug wa nay lain pa ang tinubdan sa kagubot sa atong nasud karon. Agree sab mi sa maestra nga ang kadawo sa gahum maoy nagtukmod sa mga anti-Gloria sa ilang tinguha sa pag-destabilize sa administrasyon ni GMA aron kini matumba.

Mag-ampo na lang ta nga dili malusno sa hingpit ang atong nasud nga ning panahona morag mitakilid na.