Mipadala siya kanako og tubag kabahin sa isyu nga atong gipublikar nga dunay nagduda kaniya nga mihimo siya og pagpangilkil sa mga drayber nga moagi diha sa Carcar.
Matud ni Bustamante nga sa unom ka tuig niyang panerbisyo sa kagamhanan, nagbinuotan g'yod siya sa trabaho. Nagtoo si Bustamante nga ang namasangil kaniya mao kadtong mga tawo nga iyang nadakpan.
Gihagit niya si bisan kinsa nga mopakita og mga ebidensya ug pasakaan siya og kaso.
Nakita nako sa mga dukomento nga gipadala kanako ni Bustamante nga daghan g'yod siya og mga dinakpan nga mga drayber nga nakahimo og kalapasan sa mga lagda nga gilatid sa Republic Act 4136.
Maayo kon tinuod nga wala ka magbinuang Mr. Bustamante. Apan awhagon usab nako ang mga mireklamo nga mopakita mo og ebidensya.
Duna may miingon nga may nakuha sila nga "footage" sa pagdawat ni Bustamante og kwarta gikan sa dinakpang drayber, sigi ipakita na.
Usbon nako Mr. Bustamante, salamat sa imong pagtubag sa reklamo nga gipaagi kanako.
Sayonan ka, ang maong dapit gitagana isip merkado apan unsay gihimo sa mga mapahimuslanon? Gitukoran og panimalay ang maong dapit.
Unsaon nga ang nagdumala kaniadto sa atong kamerkadohan, daw sa natulog ra man ug wala magtuman sa ilang katungdanan. Unya, panahon sa mga adlaw nga tingsweldo, mag-una pa pagkobra. Walay uwaw.
Nagduda hinoon ko nga dili makahimo og lig-on nga baruganan ang market authority sa problema sa City Hall kabahin sa Warwicks Barracks. Abi ninyo og ngano?
Ang market authority gidumala sa city administrator. Ang Cebu City administrator karon mao si Francisco "Bimbo" Fernandez nga gihulagway nga buotan kaayo ngadto sa mga "urban poor."
Si Fernandez mao gani kaniadto ang consultant ni mayor Osmeña sa urban poor matters. Aw, ingna ko bakakon kon makahimo ba og lig-on nga baruganan ang market authority.
Sayonan ka, ang dakbayan sa Sugbo maalkanse og mga pito ka milyon ka pesos gikan sa buhis nga makolekta unta gikan sa mga tindera nga mookopar sa Warwicks Barracks.
Inay mokobra ang City Hall og modul-an sa P9 ka milyon matag tuig, mikita ra sila og kapinsa P207,000. Grabe kaayo.
Nasayod ko nga ang mga tindera diha sa Warwicks Barracks masuko niining akong baruganan, apan nasayod ko nga pila ra kamong masuko kanako kay sa malipay kon mabungkag ang inyong mga pinuy-anan.
Sama god sa pagpanguba sa mga tindahan nga diha kaniadto sa daplin sa Osmeña boulevard. Dili ba daghan ang nalipay?