Sa nanglabay'ng mga adlaw, paspas kaayo ang panghitabo nga naghatag og dakong krisis sa politika sa nasud. Nagsugod kini sa isyu sa jueteng nga naglambigit sa Unang Pamilya kansang ubang mga miyembro giingong magdawatan og payola sa gidiling sugal.
Ug misunod na usab kining giingong tape nga nagbulgar sa pagtikas ni Arroyo sa nakalabay'ng piniliay. Unya misakay usab dayon ang oposisyon ug ubang mga militante'ng grupo nga determinado g'yud nga mapalagpot ang presidente sa iyang katungdanan.
Apan wala mokubit sa ilang lakang ang ordinaryong katawhan. Gani atong makita nga kadto lamang taga-oposisyon ug pundok sa mga militante ang naglatagaw sa kadalanan batok sa kagamhanan.
Dinhi atong makita nga pakyas sila pagdagkot sa pabilo alang sa rebolusyonaryo'ng kalihokan pagpalagpot sa Presidente. Siguro kulang sa pagtuo ang kinabag-an nga nanikas g'yud sa tinud-anay si Arroyo sa nakalabay'ng eleksiyon.
Gani didto lamang sa kamaynilaan ang mga protesta nga mugna niining kaguliyang sa politika. Apan sa laing lugar sa nasud pabilin ang pagkamalinawon ug walay sinyales sa unsa mang protesta batok sa kagamhanan.
Dili siguro ganahan manghilabot ang mga molupyo sa ubang lugar tungod kay gipul-an na siguro sila sa sige'ng pamolitika niining mga hakog sa gahom kinsa walay laing mahimo kondili ang pagsabwag og kaguliyang aron pag-destabilize sa gobiyerno.
Apan kon mosanong si Arroyo sa demanda sa oposisyon ug mga militante sa pagkanaug sa katungdanan, kinsa may atong ipuli kaniya? Gusto ba kita mga mobalik si Joseph Estrada sa Malacañang? Mosugot ba kita nga si Susan Roces o si Senador Aquilino Pimentel o si Senador Panfilo Lacson maoy mopuli sa posisyon ni Arroyo?
Wala akoy nakita nga indibidwal nga angay ihulip ni Arroyo sa katungdanan kon moluwat g'yud siya bunga niining dakong kontrobersiya nga iyang giatubang. Kini sa rason nga wala ni usa ka personalidad sa oposisyon nga angayan usab nga modumala sa nasud.
Apan kining kaguliyang karon sa kaulohan nakapasamot hinuon sa nagusbat na nga imahe sa Pilipinas taliwala sa internasyonal nga komunidad. Sama ra nga atong gisugba ang atong nasud ngadto sa baga sa pagkaalaot.
Dili ba nga daan na kitang giyam-iran sa mga langyaw'ng magpapatigayon tungod sa tandogon natong sitwasyon sa kahusay ug kalinaw?