Ayon sa aking bubuwit, happy birthday muna kay Isabela Rep. Rodito Albano, Mayor Rodrigo Duterte ng Davao City; Mayor Celso Lobregat ng Zamboanga City; Marine Col. Ariel Querubin, Eduardo ‘‘Maestro’’ Mandapat Sr., Goya Magno, Josel Mallari at Jomar Canlas.
Ayon sa aking bubuwit, bukod kay Senator Loi, nabiktima rin pala ang isang congressman.
Kaya lang, magkaiba ang kanilang sitwasyon. Halatang harassment ang ginawa sa senadora dahil ang isyu ay may kinalaman sa plunder case ni Erap Estrada na wala namang jurisdiction ang US. Samantalang si congressman ay pinigil dahil sa hinalang gagawa ng masama.
Medyo matapang kasi ang hitsura ni Congressman kaya siguro pinagdudahan ng mga Kano sa airport ng San Francisco.
Ayon sa aking bubuwit, sa check-in counter pa lamang sa airport ng San Francisco ay tinanong na si Congressman kung ano ang kanyang mga dala.
Standard Operating Procedure (SOP) na kasi sa US kapag nag-check in ka ng mga bagahe sa bawat paliparan ay tinatanong kung ikaw ang nag-impake ng iyong mga bagahe.
Kung ikaw ay may dalang mga deadly weapon o kaya ay anumang armas.
Ayon sa aking bubuwit, sa halip na sumagot ng matino ang kongresista, ito ay maaring nagyabang o kaya ay nagbiro lamang.
Ang isinagot ba naman ay meron daw siyang dalang granada. Naku, tumawag kaagad ng security at siniyasat ang kanyang mga bagahe.
Dinala ng mga immigration authorities sa interrogation room at inimbestigahan ng mahigit isang oras.
Eh di siyempre, katakot-takot ang mga tinanong kay Congressman kung sino siya, saan siya galing at kung sinu-sino ang pinuntahan at kinausap niya sa US.
Pero, mahigpit siyang binalaan na huwag nang magbibiro na may dala siyang granada.
Ayon sa aking bubuwit, ang congressman na pinigil at ininterrogate sa US ay walang iba kundi si Congressman…
Siya ay si Congressman mula sa Bicol Region. Siya ay si Congressman S. as in Siling Labuyo.