Panalo ka pa rin Manny!

NATALO man si Manny Pacquiao ni Eric Morales, panalo pa rin siya sa mga kababayang Pinoy.

Na-head-butt si Manny at marami ang nagtaka kung bakit hindi dineklarang head butt ng Mexican referee na si Joe Cortez para nabawasan ng puntos si Morales. Lumabas na pumutok ang kilay ni Manny dahil sa suntok ni Morales.

Napakaganda ng ipinakitang laban ni Pacquiao. Walang takot na nakipagpukpukan kay Morales.

Sa panayam kay Pacquiao, matapos ang laban, halata ang panlulumo niya na parang ikinahihiya niya ang pagkatalo. Sinabi niyang ginawa niya ang kanyang makakaya subalit hindi niya inaasahan na mauumpog siya ng ulo ni Morales. Mangiyak-ngiyak si Manny na humingi ng despensa sa mga kababayang Pilipino.

Nasisiguro ko na hindi pa rin nababawasan ang respeto at paghanga ng mga Pilipino kay Pacquiao kahit na natalo siya. Walang dapat ikahiya si Manny sapagkat ginawa naman niyang lahat ang kanyang makakaya upang magtagumpay. Ganyan talaga ang buhay, may natatalo at may nagtatagumpay. Hindi niya ginustong matalo. Better luck next time, Manny Pacquiao!