Puwede ba akong mag-member sa Pag-IBIG ?

Dear Sec. Mike Defensor,

Natutuwa po ako sa inyong dedikasyon sa pagtulong sa aming mahihirap na nangangarap ding magkaroon ng sariling lupa at bahay.

Ako po ay housekeeper lamang. Nag-aalaga sa aking mga anak habang ang aking asawa ay naghahanapbuhay.

Maaari po ba akong maging boluntaryong miyembro ng Pag-IBIG kagaya ng sa Philhealth? Anu-ano po ang mga benepisyo ng isang miyembro ng Pag-IBIG? –MYRNA, Pasig City

Ang Pag-IBIG Fund ay bukas sa ating mga kababayan na nais maging miyembro sa ilalim ng voluntary membership:

1. Pribadong manggagawa na sumasahod lamang ng mas mababa sa P4,000 bawat buwan.

2. Nagtatrabaho sa pamahalaan na tumatanggap ng buwanang sahod na mas mababa sa P4,000.

3. Mga overseas foreign workers

4. Residente at imigrante sa US at Canada

5. Sakop ng informal sector kagaya ng mga miyembro ng kooperatibo.

6. At di-nagtatrabahong asawa.

Ang buwanang kontribusyon na inihuhulog sa Pag-IBIG ay maaaring i-withdraw ayon sa alituntunin ng Pag-IBIG. Sa pagiging miyembro ng Pag-IBIG, maaari ring makahiram ng short term loan dito.

Sa karagdagang impormasyon, maaari po kayong tumawag sa 8114401 (Trunk-Line) ng Pag-IBIG o magsadya sa pinakamalapit na Pag-IBIG Office malapit sa inyo.