Ultimatum ni Manda sa mga sitsit pasahero

BINALAAN ni MIAA general manager Ed Manda ang mga abusadong sitsit pasahero o ang tinatawag na mga solicitors sa NAIA na ihinto ang kanilang kalokohan sa pagkuha ng mga pasaherong dumarating ng Pinas.

Nabuwisit si Manda ng mamonitor ng kanyang tanggapan ang mga nangyayaring pang-aabuso ng mga ito.

Sinabi ni Manda na hina-hassle ng mga sitsit pasahero ang mga arriving passengers para sa kanilang mga sasakyan nila ito sumakay kung wala silang mga sundo.

Hindi na kasi makaugaga ang mga arriving passengers dahil ginigipit ito ng mga sitsit pasahero paglabas ng exit gate patungong arrival extention.

Si AGOD bossing Bing Lina, ay nagbitiw sa tungkulin bilang hepe ng transportation committee na humahawak sa mga concessionaires sa buong NAIA.

Naasar si Lina, dahil masyadong abusado ang ilan sa mga sitsit pasahero at mga driver ng mga authorized vehicles na pumipik-up ng pasahero sa arrival area ng Terminal 1 at 2.

May ilang miyembro ng Industrial Security Guard ang pumapatong sa mga taong inirereklamo sa tanggapan ni Manda, ani Lina.

Sinabi ni Lina, wala kasi silang police power para hulihin o ikulong ang mga dumaraming illegal solicitors.

Gayunman, nagtataka naman ang mga kuwago ng ORA MISMO, dahil sa concessionaire contract may nakasaad dito na bawal ang mga solicitor na pumasok sa airport.

‘‘Management din ang lumabag dito dahil kung naghigpit sila sana ngayon wala silang problema’’ anang kuwagong sepulturero.

‘‘May ultimatum si Manda na aalisin ang mga sitsit pasahero sa arrival curb side at ibababa ang mga ito sa arrival extension area,’’ sabi ng kuwagong SPO-10 sa Crame.

"May pera ba sa airport kaya maraming illegal dito?’’

‘‘Kailangan pa bang i-memorize iyan?’’ sabi ng kuwagong binging mahilig makinig sa tsismis.

‘‘Siguro dapat si Manda mismo ang umaksyon sa lumalalang problema.’’

‘‘Iyan ang abangan natin, kamote!’’