Dalawang mambabatas,gusto nang makipaghiwalay sa kani-kanilang asawa ?

ALAM n’yo bang nagbabalak na umanong makipaghiwalay sa kani-kanilang mga asawa ang dalawang mambabatas upang sila na ang magsama?

Ayon sa aking bubuwit, 51 days na lang at Pasko na.

Happy birthday muna kay Vice-Admiral Reuben Lista ng PCG; Lt. Gen. Dominguez ng PA; WB Gen. Jimmy Canatoy, Lipa City Mayor Vilma Santos, Bro. McKentyre Cabrera at Ed Espiritu ng DZRH.

* * *

Alam n’yo bang mainit ngayon ang usap-usapan ng mga mambabatas sa dalawa nilang kasamahan?

Ayon sa aking bubuwit, kahit anong gawin ng dalawa na itago ang kanilang love affair ay hindi na yata ito maiiwasang sumabog.

Kasi sa loob mismo ng kanilang tanggapan ay maugong ang kuwentuhan ng mga mambabatas, mga staff at pati mga security officers at mga guwardiya tungkol sa kanila. Pati pananamit at pagiging sexy ng babaing mambabatas ay binibigyan nila ng kahulugan. Mabuti pa raw si Madam sapagkat parang dalagang nagmumurang kamias. In short, parang bumabata at lalong gumaganda.

Ayon sa aking bubuwit, pinag-uusapan na ng mag-lover kung paano sila makikipaghiwalay sa kani-kanilang asawa.

Balitang on the rocks ngayon ang pagsasama ni Mr. Mambabatas sa kanyang misis. Dahil sa sobrang selos ni misis ay nagtungo ito sa abroad at iniwanan ang mambabatas. Walang kamalay-malay si Misis na natuwa si Mr. mambabatas sa kanyang ginawa.

Ganyan din ang report tungkol naman sa mister ni Ms. Mambabatas sapagkat madalas na silang hindi magkita ngayon.

Sino kaya sa dalawang mambabatas ang unang magpa-file ng annulment case?

* * *

Ayon sa aking bubuwit, si Mr. Mambabatas na diumanoy may illicit love affair sa kanyang kapwa mam-babatas ay si… siya ay simpleng matulis.

Nagkaroon siya ng affair sa isa niyang staff na abogada. May report din na naasembolan niya ang magandang staff na ito kaya biglang nawala at nagtungo sa Amerika.

Samantala, si Ms. Mambabatas naman ay may magandang kinakaharap sa kanyang political career.

Hindi kaya biglang masira ang kanyang political ambition kapag sumabog ang isyung ito? Baka madaig pa ang impeachment case na kinakaharap ni Chief Justice Hilario Davide Jr.

Hayy, tingnan mo nga naman ang pag-ibig.

Ayon sa aking bubuwit, ang dalawang mambabatas na mainit na pinag-uusapan ng kanilang kapwa mambabatas ay sina…

Hay naku, itanong n’yo na lang sa mga senador.