Drug lord tatakbo para Presidente

MALAKING raket na ang droga sa Pilipinas. May 1.8 milyon adik at 3.5 milyon minsanan tumitira, karamiha’y shabu. Kung ang 1.8 milyon adik ay iiskor ng P100-sachet ng shabu 10 araw kada buwan, aabot sa P21.6 bilyon kada taon. Kung ang 3.5 milyon pang minsanan tumitira ay iiskor ng P100-sachet kada buwan, dagdag pa ‘yang P4.2 bilyon. ‘Yang total na P25.8 bilyon taunang kita sa droga ay malaki pa sa budget ng AFP o PNP. Ikatlo nu’n ang tubo ng mga sindikato. Ikatlo ang napupunta sa 150,000 pusher sa buong bansa.

Marami pa silang mabibiktima mula sa milyon-milyong dukha.

Ayon sa Philippine Drug Enforcement Agency, 11 transnational drug syndicates-mga dikit sa Chinese Triads – ang kumikilos sa bansa. Dagdag pa rito ang 215 local syndicates. Simula Marso, sunod-sunod ang PDEA raids sa shabu laboratories at bodega. Libu-libong kilong droga ang nakumpiska mula sa isang dosenang sindikato. Umaaray sila. Pero dahil kriminal, hindi nakikipaglaban ng sabayan sa gobyerno. Pangmadaliang estilo ang manuhol ng pulis, piskal o huwes. Pangmatagalang estilo ang magpuwesto ng alipores sa gobyerno.

Kung nagawa ng narcosyndicates magpuwesto sa Southern Luzon, Central Visayas at Northern Mindanao, kaya na rin nila magpuwesto sa pambansa. Batay sa pagsibak ng Korte Suprema sa isang justice, napasok na ang Court of Appeals. Batay sa imbestigasyon ng Senado nu’ng 2001, maaring napasok na rin ang Kongreso. Susunod na target siyempre ang Malacañang. Ayon sa religious at civic leaders, kapansin-pansin daw ang pagka-panalo ng maraming lokal na drug lords nu’ng huling barangay election. Hinala nila, kikilos ang mga ito para magpa-panalo naman ng kandidato para Presidente sa 2004.

Tinatayang P2 bilyon ang dapat gastusin sa seryosong kampanya ng isang presidential candidate. Barya lang ’yan sa kandidato ng drug lords. Gagawin nila ang lahat para manalo – at protektahan at palaguin ang ilegal na negosyo. Nagawa na nila ‘yan sa Colombia at Equador.