Mga pagkaing nagpapadaloy ng dugo sa puso at utak

KAPAG sumapit na sa 40 years old ang lalaki o babae, dapat nang maging maingat. May mga sakit na hereditary o namamana na lumilitaw sa ganitong edad. Humihina na ang immune system kaya dapat na maging malusog upang maiwasan ang pagkakasakit. Panatilihin ang wastong pagkain, pag-inom ng maraming tubig at pag-eehersisyo.

Ayon kay Dr. Arturo Estuita, internist-cardiologist-preventist, dapat alamin ang mga pagkaing nakasasama sa katawan gaya ng karneng ma-cholesterol. Ito ang dahilan ng pagbabara ng mga ugat kaya hindi maayos na nakadadaloy ang dugo.

Inirerekomenda ni Dr. Estuita na iwasan ang mga pagkaing mamantika at may salitre. Kumain ng mga pagkaing mayaman sa bitamina tulad ng high fiber foods na gaya ng kalabasa, sayote, okra at mga green leafy vegetables. Masustansiya rin ang mga sariwang prutas at herbal supplements na nagpapadaloy ng dugo sa puso at utak.

Sinabi pa ni Dr. Estuita na karaniwan na sa mga tumatanda ang dinadapuan ng Alzheimer’s Disease. Ayon kay Dr. Estuita ay tumatama rin ang sakit na ito maging sa mga 40 years old. Marami rin ang may problema sa kanilang digestive system kung kaya’t nahihirapan silang dumumi. Dapat silang uminom ng maraming tubig, kumain ng non-oxidant food at mag-exercise.