PILANTIK - Salamat at sayang

Maraming salamat sa mga botante,
may bago ng mayor itong Quezon City;
ang dating speaker – si Sonny Belmonte
doo’y inihalal ng nakararami!

At sa Muntinlupa – lunsod na maganda
si Jimmy Fresnedi siyang pinagpala;
ang mga botante’y nagkaisa-isa
na muling iluklok na alkalde nila!

Sa isang probinsiya – sa Laguna province
Si Ningning Lazaro lalong nagluningning
ang kanyang tinalo ng malaking ‘‘margin’’
si Kuya Bert Lina’ng di pa hinog mandin!

Sa pagka-Congressman na kumandidato
ay sayang na sayang isang paborito;
Si Ignacio Bunye na iniidolo
nitong Muntinlupa ay biglang natalo!

At natalo pa ring kahina-hinayang
Alita Mercado ng kilalang angkan;
kung siya’y nagwagi’t pinagtiwalaan
lalo pang uunlad kanyang lalawigan!

Ang isa pang sayang sa mga natalo
si Baby Cataquiz ng bayang San Pedro;
matagal nang hangad ng babaeng ito
siya ay maglingkod sa maraming tao!