Lalo lamang lilituhin ang taumbayan ng resolusyon ni Enrile. Sa halip na matulungang mapayapa ang kalooban ay lalo pang matutuliro. Sa aming paniwala’y isang malaking kamalian na idaos ang snap election. Pagsasayang din lamang ito ng pera at panahon. Kung magkakaganito, lalong malulubog sa utang ang dapang-dapang ekonomiya ng bansa. Mula nang sumabog ang jueteng scandal ay lalong sumisid ang piso.
Ayon kay Enrile, ang pagdaraos ng snap election ay magiging katulad ng ginawa ng dating diktador Ferdinand Marcos noong February 1986. Kailangan aniyang magpasya ang tao at ma-re-establish ang legitimacy ng Estrada administration. Sa aming paniwala’y hindi na nararapat pang malaman kung may karisma pa si Estrada sa masa. Si Estrada na mismo ang nagsabi na mataas ang kanyang porsiyento sa mga survey na isinagawa. Ano pa ang halaga ng snap election kung mismong ang Presidente na nagsasabing mahal pa rin siya ng masa at may suporta siya. Kung hihimayin ang sinabi ni Guingona maaaring may bahid ng katotohanang kaya naghain ng resolusyon sa snap election si Enrile ay upang ligawin ang taumbayan sa isyu ng jueteng.
Mas makabubuting ang sinimulang pag-iimbestiga sa ibinulgar ng jueteng lord na si Singson ang busisiin pa ng senado at huwag nang dalhin pa kung saan-saan pa. Ilantad ang mga taong isinasangkot ni Singson gaya ng misteryosang si Yolanda Ricaforte na umano’y auditor at naghahawak ng ledger. Hukayin ang kaso hanggang malantad ang katotohanan. Ito ang kailangan at hindi ang snap election.