EDITORYAL — Troll farms

Sa miaging semana, gironda sa National Bureau of Investigation (NBI)  ang us aka illegal nga online gaming hubs ug scam hubs sa Zamboanga Sibugay diin niresulta sa pagkasikop sa 244 ka mga foreign nationals nga kasagaran mga Chinese nationals.

Sama ni sa offshore gaming ug love scam operation nga pulos illegal ubos sa mga balaod sa Pilipinas. Daghang nakuha nga mga gadgets sama sa mga cellphones, laptops, computers ug uban pa.

Hagbay ng gidili ang operasyon sa offshore online gaming, pero nganong naa man gihapoy operasyong sama niini? Naa bay nagpaluyo kanila? Mga politiko ba kaha o mga impluwensyadong opisyal sa gobiyerno.

Karun naay laing anggulo nga gitan-aw ang NBI kun kaning operasyon sa grupo naglambigit ba anang pangimpluwensiya sa hunahuna ug opinyon sa mga Pilipino may kalabotan sa nagkalain-laing isyu.

Husto nga gisubay sa NBI kining operasyona kun mga troll farms ba pud ni sila.

Kaning troll farms usa ka operasyon diin bubo-an nila og nagkalain-laing mga posts ang social media para magpakatap og mga impormasyon.

Apan subo lang nga sagad sa mga ipang-post aning mga troll farms may kalabotan sa politika. Pagdaut sa mga politiko, partido o organisasyon para iabante ang interes sa ilang gipaborang politiko.

Nahitabo ni sa nakalabay nga duha ka mga national elections nga nakaimpluwensiya gyud sa opinion ug panghunahuna sa mga botante.

Kung naay public officials o politiko nga nagpaluyo niini, madudahan gyud nga gigamit kini isip troll farms.

Kay atol sa pagronda, nakakuha ang NBI og 3,000 hangtud 4,000 ka cellphones sa site, apil sab ang mga SIM cards ug international mobile subscriber identity (IMSI) catchers nga gigamit para kopyahon ang mga lehitimong cell sites aron maka-konektar sa mga mobile phones ug makakolekta og impormasyon.

Matud pa sa NBI, ang nakuhang mga gadgets magamit sa mass text messaging. Dili mabasol nganong kinahanglan kining apilon og imbestigar sa NBI.

Kini tungod kay duna kini implikasyon sa kaugmaon sa seguridad sa Pilipinas nunot aning tensiyon karon tali sa China.

Daan ng nagduda ang mga otoridad nga naay foreign interference nga nahitabo dinhi aron impluwensiyahan ang mga eleksyon sa nasud.