CESAFI Season 26 gilusad

CEBU, Philippines — Tulo ka mga bag-ong eskwelahan, usa ka bag-ong sport, ug bag-ong digital nga plataporma  ang nagpaabot sa fans alang sa giatngan nga Cebu Schools Athletic Foundation, Inc. (CESAFI) 2026 season, nga sugdan pinaagi sa naandan niining  torneyo sa basketball karong Sabado, Agosto 29, sa Cebu Coliseum.

Si CESAFI Commissioner Felix “Boy” Tiukinhoy, Jr. mipahibawo nga usa sa nindot nga mga kausaban ning season mao ang pagsulod sa liga sa bantawan sa teknolohiya pinaagi sa CESAFI.ph.

“Sulod sa daghang katuigan, ang CESAFI nahimong dakong bahin sa student-sports nga eksena sa Sugbo, diin ang kompetisyon ug garbo sa matag eskwelahan maoy naghulma sa kasaysayan niini. Karon, gipadako sa liga kini nga kasinatian lapas na sa pisikal nga binyu,” matud ni Tiukinhoy atol sa pormal nga paglusad sa CESAFI Season 26 niadtong Miyerkules, Agosto 26, sa Marco Polo Hotel.

“Ang CESAFI.ph naghatag og digital ecosystem diin ang mga fans makatan-aw na karon og livestreams ug senemana nga recap sa mga duwa, makasubay sa kompetisyon, makakita sa iskedyul ug makakuha og impormasyon bahin sa mga duwa, ug magpabiling konektado sa mga atleta ug mga team nga naglangkob sa liga. Ma-access kini pinaagi sa website ug usa ka ma-download nga app, nga naglangkob sa nagkalain-laing sports sa CESAFI ug naghatag og mas dakong visibility sa mga duwa.”

 Nagkanayon si Tiukinhoy nga kining  plataporma nagbukas usab og bag-ong mga paagi alang sa liga aron masugilon ang mga istorya luyo sa mga duwa, lakip na ang player profiles ug live statistics.

“Uban sa mga batan-ong atleta nga anaa sa sentro niining kasinatian, ang CESAFI naghatag kanila og digital nga luna diin mahimong matala ang ilang mga kalampusan sa tibuok nilang karera sa CESAFI ug ipaambit kini sa mga tunghaan ug sa mas lapad nga komunidad,” padayon pa ni Tiukinhoy.

“Sa kasingkasing niining kausaban mao ang usa ka yano nga ideya, nga ang matag duwa angay masaksihan sulod man o gawas sa venue, ug magpabiling ma-access sa mga subscribers bisan human sa season. Isip pinuy-anan sa student sports sa Sugbo, tumong sa CESAFI nga hatagan ang sunod nga henerasyon sa mga atleta ug sa ilang mga istorya og luna diin sila mahinumdoman.”

Sa laing bahin, miabot sa 13 ka mga eskwelahan, lakip ang mga bag-ong apil nga San Roque College de Cebu (SRCDC) Greyhounds ug PAREF Springdale Titans, ang mosalmot sa juniors category, samtang siyam ka eskwelahan ang mopakita'g aksiyon sa college division, lakip na ang bag-ong koponan nga University of Cebu Lapu-Lapu and Mandaue (UCLM).

Ang pickleball (college level) kumbatihan sa unang higayon  sa premirong inter-school nga liga sa Sugbo.

Ang ubang sports events sa kalendaryo sa CESAFI ning tuiga naglangkob sa athletics, badminton, beach volleyball, chess, dancesport, football, karatedo, scrabble, swimming, table tennis, taekwondo, tennis, volleyball, ug e-sports.