“Lab-as ug Tukma”

Giawhag ni Defense Secretary Gibo Teodoro ang tanang opisyal sa gobiyerno, labi pa ang mga pinili sa katawhan, nga tua modapig sa China sa kontrobersiyal nga isyu sa West Philippine Sea nga moluwat sa ilang katungdanan.

Dugay ko na nga gibalik-balik dinhi sa maong lindog nga dili makiangayon alang sa nasud ug sa mga Pilipino nga maoy nagpalamon sa maong mga opisyal apan ang interest sa China maoy giprotehian inay nga ang katungod sa ilang kaugalingong nasud.

Tugoti nga akong huwaman ang mga pulong sa beteranong magsisibya nga si Sam Costanilla paghulagway sa panawagan ni Teodoro.

“Lab-as ug Tukma, Haum ug Sibo, Angay ug Matarong Gayud” ang maong panawagan tungod kay way katungod magpabilin sa ilang pwesto ang maong mga opisyal kun ang interest sa China maoy ilang gidapigan.

“Lab-as ug Tukma” tungod kay ang usa ka opisyal sa gobyerno dunay gipanumpaan nga mosunod sa tanang balaod ug lagda. Ang katungod sa Pilipinas sa West Philippine Sea gibasi sa balaod nga giila sa tinipong kahugpongan sa mga nasud sa kalibotan.

Usa na ka dekada sukad naangkon sa Pilipinas ang arbitral award nga nag-ila sa lihitimong katungod niini sa West Philippine Sea. Ang maong arbitral award gisuportahan ug gitamod sa tanang kanaasuran sa kalibutan ug bugtong ang China lang ang wala morespito niini.

“Haum ug Sibo” tungod kay mao ni ang angayang buhaton sa usa ka opisyal nga traydor sa interest sa iyang kaugalingong nasud. Ang pagresign maoy labing haum nga buhaton sa usa ka opisyal sibo sa iyang pagbudhi sa pagsalig sa publiko.

“Angay ug Matarong Gayud” tungod kay usa ka dakong inhustisya sa nasud ug sa katawhan niini ang padayong pagsweldo og mga kaaway sa interest sa mga Pilipino. Busa kun dunay dyutay’ng uwaw nga nahabilin niining maong mga opisyal nga mga hinanib sa China mas maayong mosanong sila sa panawagan ni Teodoro.

Wa nay rason nga magpabilin mo sa pwesto tungod kay wala magkinahanglan ang nasud ug ang katawhan niini og traydor sa interest sa Pilipinas. Panahon na sa pagpili og kang kinsang interest ang inyong dapigan sa Pilipinas o sa China?