Kurapsyon lang ang ni-develop

Namahayag si Presidente Ferdinand Marcos, Jr. nga wala siya mabalaka nga mahimong mawad-an ang Pilipinas og mga developmental grants human gi-reclassify sa World Bank ang Pilipinas nga usa na ka upper-middle-income economy.  Mora’g gi-asukaran ra ang pamahayag sa World Bank luyo sa laraw nga dili na kini mohatag og mga developmental grants.  Mahinumduman nga gisaway pag-ayo sa World Bank ang kuyanap nga kurapsyon sa Pilipinas. Alang tingale sa World Bank, “unsay pulos sa developmental grants kon ang ni-develop mao lamang ang bulsa sa mga kurap ug dili ang ekonomiya.” Muleeng!

Tulibagbag nga sugyot

Supak ang pundok sa mga health professionals sa proposal ni Executive Secretary Ralph Recto nga i-base ang matang sa benepisyo nga madawat sa matag miyembro gikan sa PhiHealth ngadto sa gidak-on sa kontribusyon nga iyang nahatag.  Alang sa mga health professionals, mosangpot hinoon kini ngadto sa dili patas ug dili maki-angayon nga benepisyo gikan sa PhilHealth. Kon ma-aprobahan kining sugyot ni Recto, sama ra nga gipahimangnoan sa gobyerno nga “kutob ra sa hilanat, sip-on ug ubo ang sakit sa mga kabus nga miyembro aron sila makapahimulos sa PhilHealth.”  Madahaan!

Uyamot lang gihapon

Segun sa Philippine Rice Research Institute (PhilRice), manghatag ang kagamhanan og binhi nga mobunga og mas maanindot ug taas og abot aron sa pagpausbaw sa kita sa mga mag-uuma.  Ipang-apod-apod ang binhi sa sunod tuig nga tingtanom. Dili lang sa gidaghanon sa ani ang basehan sa pag-usbaw sa kita sa mga mag-uuma kon dili lakip usab ang makiangayon nga presyo sa pagkompra sa ilang abot.  Kon dili ma-stabilize ang presyo sa palay makatuaw gihapon kita sa pag-ingon, “Ang ani daghan na, apan kabos ug uyamot gihapon ang atong mga mag-uuma.”  Fezteleern!

Itudlo ang PMA

Gikonsiderar karon sa Sangguniang Panlalawigan sa Sugbo ang pagpasaka og ordinansa nga mag-promote sa responsableng pagbaton og armas human sa nahitabong pagpamusil didto sa Tacloban City.  Aduna na’y daghan balaod kabahin sa responsible’ng pagbaton og armas, ang kulang na lang mao ang tinuoray nga pagpatuman.  Mas maayo pa tingale, tun-an ang pagpabalik sa curriculum kabahin sa good manners and right conduct (GMRC). Kon dili ibalik ang GMRC, misugyot ang akong amigo nga ilakip sa curriculum ang subject nga PMA (Pedicure, Manicure ug Alot), aron mabalanse ang kaisog ug pagkahinhin sa mga tinun-an.  Ahahaay!

 Abir, unsay bation?

Giaprobahan sa konseho sa dakbayan sa Sugbo ang resolusyon nga nagsupak sa plano sa Department of Transportation (DOTr) nga hatagan og prayoridad ang segment sa Cebu Bus Rapid Transit (CBRT) nga motadlas sa South Road Properties dungan ang pagduso sa una’ng pagpatuman sa orihinal nga Bulacao-to-Talamban corridor.  Bisan sa maong resolusyon, dili pa piho kon mapugngan ba niini ang DOTr sa illang paghatag prayoridad sa SRP segment.  Makapahinumdum sa lalaki nga bisan wala sugta sa iyang gipanguyaban, magsige lang gihapon og labay-labay sa balay sa babaye.  Matud pa sa lalaki, “Ako lang gisuta kon unsay iyang bation kon makakita siya nako.”  Pagkatoytoy!