Nihit og tubig?

Nahukman sa kadagkoan sa Metro Cebu Water District (MCWD) nga aron molahutay pa og dugay-dugay nga dili mahurot ang supply nila nga tubig sa Jaclupan Dam sa Talisay, pakubsan nila ang tubig nga kuhaon matag adlaw.

Matud ni MCWD General Manager John DX Lapid nga imbes mokuha sila og 30,000 cubic meters (150,000 ka baril) nga tubig kada adlaw gikan sa Jaclupan Dam, mokuha lang sila og 20,000 cubic meters kada adlaw.

Unsay epekto niini? Matud ni Lapid nga dunay mga dapit nga ang tubig moagas lang panahon sa kadlawon, ug kinahanglan nga ang apektadong mga pamilya magpundo og tubig.

Mao kini ang nahukman sa MCWD Board aron nga ang tubig gikan sa Jaclupan Dam molahutay pa og dugay, ilabi na nga hapit na gyud mosugod ang huwaw.

Nahunahuna nako nga luoy kaayo ang mga pamilya nga apektado niini. Maayo pa lagi ang way kuryente kay sa walay tubig. Kon makasawod mo sa kadlawon, pagpundo gyud mo.

Hinuon, gibalikbalik nako pagpahibawo nga ang MCWD dunay makuha nga daghang supply nga tubig gikan sa JE Hydro & Bio-Energy Corporation nga nagkuha og tubig sa Barangay Lusaran, Cebu City.

Ang JE Hydro maka-supply og 30,000 cubic meters nga tubig kada adlaw, apan karon P20,000 cubic meters lang ang gikuha sa MCWD kada adlaw. Gikontak nako si Engr. Joffrey Hapitan, ang chairman sa JE Hydro ug gitug-anan ko niya nga maghuwat ra siya sa order sa MCWD.

Gipalapdan na nila ang ilang pundohanan og tubig, sa gilapdon nga tulo ka ektaryang lagoon nga dunay giladmon nga tulo ka dupa, puno na kini karon sa limpyo nga tubig ug andam na kon modemanda og dugang supply ang MCWD.

Tan-aw nako, dili ra gyud kaayo maproblema sa tubig ang MCWD, ilabi diri sa mga dapit sa north district barangays ug central district sa Cebu City kay maka-supply man kanila ang JE Hydro.

Ang ubang supplier sama sa Mactan Rock, Abejo ug ang Philippine Water Resources Incorporated, maka-abag man sab. Pero ang JE Hydro mao gyud ang labing dako og pundo nga magamit.

Gisusi nako ang pundohanan og tubig sa JE Hydro ug ako gyud nga napamatud-an nga wa mamakak si Engr. Hapitan nga daghan sila og pundo nga tubig nga ikasuplay kon manginahanglan ang MCWD.

Busa nakaingon ko nga mentras daghan og pundong tubig ang JE Hydro, dili makaingon ang MCWD nga kuwang ang ilang tubig. Ang supply nga tubig sa JE Hydro, gi-supply kini direkta sa kabarangayan sa siyudad paingon sa Busay, ug duna sa’y direkta sa Barangay Pit-os.

Angay kita nga mangandam sa pag-abot na gyud sa El Niño.