Creamline ready sa Petro Gazz

MANILA, Philippines — Maglaro man o hindi sina injured players Tots Carlos at Alyssa Valdez ay handa ang Creamline na sagupain ang nagdedepensang Petro Gazz sa knockout quarterfinals ng 2024 Premier Volleyball League (PVL) Reinforced Conference.

Haharapin ng Cool Smashers ang Gazz Angels ngayong alas-6 ng gabi matapos ang banatan ng PLDT High Speed Hitters at Chery Tiggo Crossovers sa alas-4 ng hapon sa FilOil EcoOil Centre sa San Juan City.

Bukod kina Carlos at Valdez, hindi rin naglalaro sa Creamline si Jema Galanza na kasama ng Alas Pilipinas sa training.

“Ready naman kami kung hindi sila makabalik, or makabalik sila. Ready naman iyong team, especially iyong mga bench players nagco-contribute naman talaga nang husto,” ani coach Sherwin Me­neses.

Wagi ang Petro Gazz, 25-23, 25-19, 20-25, 23-25, 15-12, sa una nilang bakbakan noong Agosto 13.

Ang magwawagi sa Cool Smashers at Gazz Angels ang haharap sa Cignal HD Spikers, sinibak ang Capital1 Solar Spikers, 25-19, 36-34, 16-25, 22-25, 15-12, sa semifinals.

Aasahan ng Creamline sina American import Erica Staunton, Michele Gumabao, Bernadeth Pons, Bea De Leon, Kyle Negrito at Pangs Panaga.

Sasandigan naman ng Petro Gazz sina import Wilma Salas, Fil-Am Brooke Van Sickle, Aiza Maizo-Pontillas, Jonah Sabete, Myla Pablo at Remy Palma.

Sa unang laro, mag-aagawan din sa semifinals ticket ang PLDT at Chery Tiggo kung saan ang mananalo ang lalaban sa Akari na nagpatalsik sa Farm Fresh, 17-25, 25-18, 25-22, 25-23, sa quarterfinals.

Tinalo ng Crossovers ang High Speed Hitters, 19-25, 25-20, 20-25, 25-21, 10-15, sa una nilang pagtutuos tampok ang 39 points ni American import Khat Bell.