Tushova nag-iwan ng marka sa PVL
MANILA, Philippines — Matapos masibak sa knockout quarterfinals ng 2024 Premier Volleyball League (PVL) Reinforced Conference ay gusto pa ring maglaro ni Russian import Marina Tushova para sa Capital1 Solar Energy sa susunod na taon.
“I hope that I will come back here to play again. And I hope that I will be better next year. And I hope that Capital1 will improve too. And I hope that I can bring something more to this team, this amazing team,” ani Tushova.
Sa kanyang paglalaro sa PVL ay tatlong beses sinira ni Tushova ang PVL scoring record.
Una niyang tinabunan ang dating PVL mark na 44 points ni Prisilla Rivera ng Dominican Republic sa five-set win ng Akari laban sa Choco Mucho sa elimination ng 2022 PVL Reinforced Conference.
Pumalo si Tushova ng bagong PVL record na 45 markers para sapawan ang nasabing iskor ni Rivera sa five-set victory ng Solar Spikers sa Flying Titans noong Agosto 3.
Binasag ng 25-anyos na Russian import ang sarili niyang record sa hinataw na 49-point explosion sa five-set win ng Capital1 sa Nxled noong Agosto 10.
Pumalo si Tushova ng bagong PVL mark na 50 points sa 19-25, 34-36, 25-16, 25-22, 12-15 kabiguan ng Capital1 sa Cignal HD sa knockout quarterfinals noong Sabado.
“I hope that fans enjoyed this game. I saw that my team enjoyed this game, too. I gave everything for this game. We need just a little bit more. And this... I don’t care about my record today. I wanted our team to win, unfortunately,” ani Tushova.
Tumapos siya na may kabuuang 301 points sa paggiya sa Solar Spikers sa kauna-unahang playoffs stint matapos magtala ng 1-10 kartada sa nakaraang PVL All-Filipino Conference.
- Latest
