VP Sara nag-sori sa KOJC sa paghimok na iboto si Pangulong Marcos
MANILA, Philippines — Kinondena nina Vice President Sara Duterte at dating Pangulong Rodrigo Duterte ang pagsalakay nitong Sabado ng mga pulis sa Kingdom of Jesus Christ (KOJC) compound kung saan pinaniniwalaang nagtatago ang kanilang lider na si Pastor Apollo Quiboloy.
Nagtipon ang mga tauhan ng Philippine National Police sa KOJC compound sa Davao City para isilbi ang warrant of arrest kay Quiboloy, na nahaharap sa kasong human trafficking at sexual abuse.
Sa inilabas na pahayag ng Bise Presidente, humingi ito ng kapatawaran sa lahat ng miyembro, deboto at bumubuo ng Kingdom of Jesus Christ, sa paghikayat at pakiusap na iboto si Pangulong Ferdinand Marcos Jr. noong 2022.
“Nais ko ring humingi ng kapatawaran sa lahat ng miyembro, deboto at bumubuo ng Kingdom of Jesus Christ, sa paghikayat at pakiusap ko sa inyong iboto si Bongbong Marcos Jr. noong 2022. Nawa’y mapatawad ninyo ako. You deserve better. Filipinos deserve better,” aniya.
Ayon kay Sara, ang “pang-aabuso” ay nangyari dahil ang akusadong si Quiboloy ay kilalang Duterte-supporter.
Ayon kay Sara, hindi siya tutol sa implementasyon ng anumang warrant of arrest kung naaayon sa batas.
“I vehemently condemn the gross abuse of police power in the takeover of the KOJC compound earlier today, which led to the harassment of religious worshipers, the abuse of minors, and the unnecessary loss of life,” pahayag pa ng bise presidente.
“These acts are not only a blatant violation of Constitutionally-protected rights but a betrayal of the trust that we, Filipinos, place in the very institution sworn to protect and serve us,” aniya pa.
Nitong Sabado, nasawi ang 50-anyos na miyembro ng KOJC matapos atakihin sa puso kasabay ng paghahain ng warrant of arrest kay Quiboloy.
Sinabi naman ni dating pangulong Rodrigo Duterte na nakakapanlumo ang kalagayan ng Pilipinas ngayon na hindi nalagay noon ang bansa.
Nananawagan din ang dating pangulo sa mga natitirang disente at makabayang miyembro ng gobyerno na huwag hayaang gamitin at maging abusado sa pagpapatupad ng mga iligal na kautusan.
- Latest
