Cebu International Convention Center, Mandaue City—Si Gobernador Gwen Garcia ang nagdiskurso sa akong pag-abot dinhi. Apan di siya maoy akong tuyo. Kon dili ang pag-abli sa booth sa TV Patrol Central Visayas, nga nagsaulog sa iyang ika-24 nga sumad tibuok buwan karong buwana, atol sa tibuok adlaw nga business summit sa Mandaue Business Month (MBM) sa Mandaue Chamber of Commerce and Industry (MCCI).
Gipaapil mi sa MCCI sa kapin sa buwan nilang kalihokan. Nga gilusad pinaagi sa Bida Kapamilya sa Mandaue City Cultural and Sports Complex niadtong Hulyo 7. Lain namong dakong kalihokan mao ang Kapamilya Dental ug Surgical Mission tibuok adlaw karong Agosto 25.
***
Lain nakong tuyo dinhi mao ang pagpaminaw ni Gabby Lopez, ang among chairman ug chief executive officer (CEO) sa ABS-CBN Corporation. Kinsa tagsa rang modawat og mga imbitasyon. Apan wa mobalibad dihang gidapit sa kadagkoan sa MCCI nga gipangulohan ni Presidente Philip Tan ug President Emeritus Eric Ng Mendoza.
Si Lopez way powerpoint presentation. Ni props sa iyang pakigpung. Apan gihangop pag-ayo sa mga negosyante ang iyang mensahe. Matud sa kasagaran sa nanambong dinhi nabatyagan nilang gikan sa kasingkasing ang iyang pagtuki sa gitahas nilang hisgutanan nga unsaon pagkab-ot og dakong bentaha batok sa labing higpit nga mga kompetinsiya.
***
Matud ni Lopez, ang negosyo kinahanglan nga mohangop ug moggakos sa paspas ug dagkong kausaban sa merkado ug teknolohiya. Nitambag siya:
• Molahutay lang ang negosyo kon magpabiling matinud-anon sa iyang kinauyokan apan andam sab sa pagsagop sa bisan unsang kausaban;
• Di na magsilbi ang paghupot og usa lang ka plano, mas mapuslanon ang paghupot og usa ka hugpong sa mga plano;
• Mahimong mag-usab-usab ang dinalian nga mga lakang apan kinahanglang ipatigbabaw ug pakigbisogan ang malungtaron nga direksiyon; ug
• Ang mas maayong pangihanglan sa paglambo sa negosyo mao ang matinud-anon nga pagpaminaw ug pagtugkad sa tuaw sa kasingkasing sa mga konsumidor.
***
Laing pakigpung nga nakadapit sa akong pagtagad mao ang pagtuki ni Dondi Joseph, Presidente sa Cebu Business Club, sa mga laraw sa Metro Cebu Development Coordinating Board (MCDCB) pagtukod sa Mega Cebu. Nga mohiusa sa nagkalainlaing local government units (LGUs) sa ilang pagduma sa trapiko, drainage, basura ug ubang kumon nga mga interes.
Masaligon si Joseph nga magmalampuson ang MCDCB bisan unsay mahitabo sa piniliay sa 2013 tungod sa kusganong pagduso sa pribadong sektor ug tungod sa dinaliang panginahanglan paghaw-as sa 1.2 milyones ka kabos sa Sugbo, nga maoy labing daghan sa nasud. Wa ilha ni Joseph kinsay iyang kaubanan sa pribadong sektor nga naglingkod sa board. Apan nahadlok kong way apil ang mga representante sa mga mamumuo ug konsumidor. Nganong di man sila ganahang maminaw sa kinabag-an nga ilang giangkong gusto nilang tabangan?
***
Email: leo_lastimosa@abs-cbn.com