Tagsa ra kong makabakasyon. Sa kataposan nakong bakasyon, nasakit pa gyud ko. Ang dakong bahin sa ako untang lulinghayaw gigahin sa higdaanan tungod sa balatian nga, salamat sa akong taphawng pag-isug-isog, wa dayon mahibaw-i ug matambali.
Nagsugod ko’g batyag ug kaluya ug panakit sa akong kabukogan sa sayong buntag niadtong Sabado. Nakalahutay pa ko sa remote broadcast sa Halad sa Kapamilya gikan sa Subangdaku Elementary School. Apan wa na ko ganahing namahaw pagpauli sa bay. Naglisud na ko’g alsa sa among bagahe, nagpatabang na lang sa drayber sa Airland taxi, nga niabot dayon pila ka gutlo human sa akong pagtawag sa telepono.
* * *
Taas kaayong linya sa mga pasahero sa Mactan. Daghang OFWs nga magsugod na pagserbisyo sa bag-o nilang mga kontrata. Nagsugod nag aslom ang akong tiyan. Maayo na lang nga pagkahibawo sa mga kawani sa Cathay Pacific nga naka-check-in na mi online, gibalhin mi sa mas mubo nga linya.
Samtang nagpaabot sa among flight, nagsugod ko’g tug-an sa akong asawang doktora nga naglain ang akong tiyan. Gipainom ko niya og init nga tsa samtang nagtan-aw sa pagtak-op na sa Boston Celtics sa NBA East Finals series batok sa Orlando Magic.
Dayong boarding time, gipahibawo ko sa mga kawani nga gi-upgrade mi sa business class. Inay magsaulog, nabalaka ko kay nabatyagan nakong sinugdanan sa hilanat.
* * *
Naglaway ko sa champagne, bino ug juice. Tubig ray akong giinom. Nahadlok na sa nagkasubsob nga daguok sa akong tiyan. Nagsugod og kahibung ang akong asawa kay, lahi sa naandan, wa nako tiwasang iyang pagkaon. Gihikap niyang akong liog ug agtang. Puwerte na nakong inita.
Gipainom dayon ko niya’g tambal. Mao say pagtugpa sa ayroplano. Mabalak-on kaayong iyang dagway. Paggawas nako sa pansayan sa tugpahanan, kuyog na niyang duha namo ka higalang stewardess. Nga pulos sab mabalak-ong nikuyog namo. Nakasabot na lang ko og ngano dihang usa nila nibira nako palayo sa thermal camera. Kon nasakpan pa diayng may hilanat, matanggong unta ko hangtod matino ang, ug maayo sa, akong sakit.
* * *
Pag-abot sa hotel, nakatug dayon ko. Nagduda ang akong asawa nga nisuol na sang akong sinusitis ug gastritis. Apan kay dugay man kong nitomar sa iyang gipanghatag nga tambal, tungod sa pagtuong ordinaryo rang akong sakit sa tiyan, nabaldado ang unang duha ka adlaw sa akong bakasyon. Kay, sama sa naandan, sakto ang akong asawa.
Kadaghan na ko molimod niya sa akong nangaging mga sakit. Kay nahadlok kong trangkahan sa among bay ug di patrabahuon. Nasakpan lang ko niya sa mga higayon nga mas grabe kay sa naandan ang akong pagkaluya. Mao nga mas maayo gyod diay nga motug-an ta sa atong asawa sa tinuod. Natong sakit.
* * *
Email:leo_lastimosa@abs-cbn.com