Husto g’yod kaayo ang awhag ni Mayor Tomas R. Osmeña ngadto sa mga botante nga dili maayong botahan kining mga kandidato nga dili motuman sa balaod, sama sa pagbutang sa ilang campaign posters sa gidili nga lugar. Kon kining maong mga kandidato wala man gani motuman sa balaod karon, unsa pa kaha kon mapili na sila sa katungdanan.
Apan mao lagi, kon ingon niini ang buhaton sa mga botante nga dili botahan kadtong mga masinupakon sa balaod, kinsa na lang kaha nga kandidato ang mahabilin? Pagka karon, pwerteng daghana nga mga propaganda materials sa mga politiko nga anaa gipamutang sa poste sa kuryente, punoan sa kahoy ug ubang dapit nga wala itugot sa Commission on Elections.
* * *
Pag-anhi sa Sugbo ni Land Transportation Office (LTO) Chief Arturo Lomibao nagkahinabi g’yod kami personal. Mitambong man god siya sa kalihukan nga mao ang paglusad sa LTO Citizens Charter ingon man ang pagpahigayon og surprise drugtest sa 50 ka PUJ drivers didto sa North Reclamation Area.
Kauban nako nga nakighinabi ni Lomibao mao si Sir Joseph "Big Joe" Mendoza, ang presidente sa Task Force Alpha, ang traffic enforcement arm sa LTO-7 dinhi sa Sugbo.
Atol sa among panaghinabi, gipasaligan kami ni Lomibao nga makabalik na ang Task Force Alpha ug ubang LTO deputized agents sa pag-operate, apan duna lang siya’y mga papeles nga ipakuha.
Giangkon ni Lomibao nga dako kaayo og nahimo ang mga sakop sa Task Force Alpha nga ang LTO dinhi sa Central Visayas nakaangkon og daghang kalampusan sa nangaging katuigan.
Kay gipahunong man ni Lomibao ang operation sa mga deputized agents sukad adtong Pebrero sa miaging tuig, mikunhod g’yod ang accomplishments sa LTO.
Ang nindot nga bahin sa among panaghinabi mao nga gitataw ni Lomibao nga wala g’yod siya’y dautang report nga nadawat batok sa mga sakop sa Task Force Alpha.
Pastilan, kon mabalik na gani ang Task Force Alpha paghimo’g operation, maguol na usab kadtong mga badlongong drayber kay sigurado man sila nga madakpan. Ang tinuod, kadtong mga buotang drayber dili man g’yod mahadlok nga daghang LTO agents ang mo-operate. Ang kusog kaayong moreklamo kini man nga mga drayber og PUJ nga kadaghanan abusado.
* * *
Tinuod ang pamahayag ni Mayor Osmeña nga daghan na og kuwarta ang dakbayan sa Sugbo. Tungod kini sa pasiunang halin sa kayutaan sa South Road Properties.
Husto si Tommy nga dakong sayop kadtong pamahayag sa usa ka kapitan sa barangay nga kon siya pa ang midaug pagka mayor sa eleksyon kaniadtong 2007, itugyan niya sa nasudnong kagamhanan ang SRP.
Nganong itugyan god tawon nga kadako sa makuwarta sa dakbayan kon mangahalin na ang kayutaan sa SRP. Aw tan-awa, dako na kaayo ang nakuwarta sa dakbayan sa pagkahalin sa pipila lang ka ektarya nga kayutaan sa SRP.
Apan samtang mitoo ko ni Tommy nga ang SRP makapaasenso sa kahimtang sa dakbayan, makaingon ko nga dili maayo ang pag-una niya paghatag og hinabang salapi sa mga tiguwang sa Cordova ug scholarship sa high school graduates sa maong lungsod.
Ang milyon-milyon ka pesos nga magasto sa dakbayan sa Sugbo alang sa maong gastohanan, mas maayo na lang unta nga magamit kini sa pagpaayo sa gubaong mga karsada dinhi sa dakbayan.
* * *
Nalipay ko kay misugod na pag-andar ang unang nahuman nga power plant sa Cebu Energy Development Corporation diha sa barangay Sangi, dakbayan sa Toledo.
Mora’g makasulbad na g’yod kini sa kakuwang sa kuryente nga maoy hinungdan sa gipatuman nga rotation brown out dinhi sa dakbayan.
* * *
Paita, karong adlawa kuno ang mga tigbaligya og petroleum products mopaminus sa presyo sa ilang mga baligya nga gasolina, krudo, kerosene ug uban pa, apan daw sa bugal-bugal.
Samtang tag peso ang pagpakubos sa presyo sa matag litro sa gasolina, 25 sentimos lang ang pagpaminus sa matag litro sa krudo. Klaro kaayo kini nga binuang. Sahi sa ilang gihimo sa nangaging mga buwan, mopakunhod sila og tag 50 sentimos matag litro, apan dantan og pipila ka adlaw mopasaka na usab og tag P2. Mora ma’g dagdag-bawas!