Angay g'yod bitaw nga estriktohon pag-ayo ang pagpatuman sa balaud nga ang mga rebentador dili g'yod ipakarga sa mga publikong sakyanan.
Kadtong mga kinompra nga rebentador ug ubang explosive products kinahanglang sakmiton kon ikarga kini sa mga passenger jeepney ug mga tricycles.
Kinahanglan nga ang kapolisan karon sa Lapu-Lapu nga gipangulohan ni Koronel Mariano Natuel mosugod na paghimo og tininuod nga checkpoint aron sakmiton ang mga pabuto nga ikarga luwan sa mga public utility vehicles.
Ang tumong sa balaud nga gidili ang pagpakarga sa mga explosive products luwan sa mga PUV's mao nga malikayan nga daghang kinabuhi sa mga inosenteng sibilyan kon aksidente nga mobuto ang mga rebentador.
Sayonan ka og ang mga kargamento nga pabuto moulbo diha sa public utility vehicles, kadaghan kaha nga mangamatay. Kon ikarga usab gani ang mga pabuto diha sa mga barko, markahi g'yod ang kargamento nga kini explosive products.
Ang tumong niini aron nga dili kini basta-basta nga iipon sa ubang kargamento.
Dili na man unta angay pang tudloan ang mga polis kay kamao na man sila sa ilang tukma nga gimbuhaton, apan basin og dunay ubang polis nga wala magtoon sa ilang "homework."
Kinahanglan nga ang mga tawo nga mo-transport sa mga produkto nga pabuto - bisan og ang gikargahan niini dili pa mga PUVs -- makapakita g'yod og dukomento nga ang ilang pinalit gikan kini sa mga lisensyado nga tighimo og pabuto.
Sa ato pa, risgo kaayo kon kamo adto mamalit og pabuto sa dili lisensyado. Kon mamalit kamo, pangayo og resibo sa inyong mga pinalit nga magpakita nga buhat kini sa mga legitimate manufacturers.
Diha ra ba sa Lapu-Lapu, duha ra kuno ang lisensyado nga tighimo og pabuto - usa niini mao ang JP Fireworks nga iya ni Julian ug Grace Pungasi, ang usa nalimot ko sa ngalan apan taga sitio Radar, sakop gihapon sa barangay Babag II.
Kon estriktohon pag-ayo sa mga polis, ang pagbaligya og pabuto dili mahimo nga bisan asa na lang. Kinahanglang dunay permit ang pagbaligya.
Apan sukad sa pagmugna sa Republic Act 7183, and balaud nga nag-regulate sa pagpanghimo, pagbaligya ug paghupot sa mga pabuto, wala g'yod niini mapatuman sa kapolisan ang tukmang lagda.
Ang mga mahinungdanong punto niining maong balaud hapit na lang nako mamimorya sa pagbalik-balik og basa dihang usa pa ako kaniadto ka police reporter.
Ang labing lisud tumanon sa mga tighimo og pabuto mao ang gilatid nga ang buhatanan sa mga rebentador adto sa dapit nga nahimutang labing minus 300 metros ang gilay-on gikan sa kinadul-an nga panimalay.
Matuman kaha ni? Naa ra man gani luyo o kaha silong sa mga balay.
* * *
Diriyot maamong ang lima ka polis dihang daw gi-hostage sila sa mga lumulopyo sa barangay Sambag II adtong Sabado atul sa pagdakop unta nila sa usa ka tawo nga nagduwa og video karera.
May mitug-an nako nga mikatap na usab diay kuno ang video karera diha sa Sambag II ug silingang mga barangay. Usa ka higala nako nga taga Tejero miingon usab nga dunay video karera sa ilang barangay.
Namingaw na man god unta kadto. Atensyon Station-1 police chief Bonifacio Garciano, duna koy nadawat nga report nga may nag-operate na usab nga video karera diha sa Kamagayan.
Maayo tingali nga ipaguba na lang sa City Hall kining Citi-Center Commercial Complex building kay sa ilawom niini, anaa ang daghang mga balay nga gihulagway nga nabulit sa mga illegal nga kalihukan.
* * *
Kaming mga sakop sa media nga nag-cover sa City Hall, gibati g'yod og kasagmuyo tungod sa pagpadiki-diki sa mga konsehal, ilabi na si Konsehal Roberto Cabarrubias nga maka-access kami sa Wi-Fi diha sa session hall.
Ang among tinguha mao nga mahimong sayon na lang kanamo ang pagpadala sa among report ngadto sa tagsa-tagsa namo ka news outlets.
Daghang mga opisyal sa City Hall nga among gitug-anan sa among sentimento, mipabor namo nga kining maong kahimanan dili unta angay'ng ihinakog, ilabi na kanamong mga City Hall reporters.
Maayo unta og mahuna-huna na ni Konsehal Cabarrubias ug ubang konsehal nga makatarunganon kaayo nga mohangyo kami nga maka-access sa Wi-Fi aron dili na kami mauwahi pagpadala sa among mga balita sa among mga newsrooms.
* * *
E-mail: birador_freeman@yahoo.com