SSS nagbukas ng Emergency Loan Program
Sa mga biktima ni ‘Maymay’, Habagat
MANILA, Philippines — Binuksan na ng Social Security System (SSS) ang Emergency Loan Program (ELP) para sa mga miyembrong naapektuhan ng bagyong Maymay at Habagat.
Layunin ng programa na magbigay ng agarang tulong pinansyal sa mga miyembro ng SSS na naapektuhan ng kalamidad.
Ayon kay SSS President and Chief Executive Officer Robert Joseph M. de Claro, nananatiling bukas ang ELP para sa lahat ng kwalipikadong miyembro sa buong bansa. Aniya, bahagi ang programa ng patuloy na pangako ng SSS na magbigay ng suporta sa mga miyembrong nangangailangan, lalo na sa panahon ng hindi inaasahang pangyayari.
Sa ilalim ng ELP, ibinaba ang kinakailangang bilang ng buwanang kontribusyon mula 36 buwan sa 18 buwan, basta’t may hindi bababa sa anim na naitalang hulog ang miyembro sa loob ng nakalipas na 12 buwan.
Kwalipikadong mag-apply ang mga self-employed, voluntary, non-working spouse, at land-based OFW members kung mayroon silang hindi bababa sa anim na buwang kontribusyon sa ilalim ng kanilang kasalukuyang membership type bago ang buwan ng aplikasyon.
Maaaring makahiram ang kwalipikadong miyembro ng hanggang P20,000 na may 7 porsiyentong interes kada taon. Babayaran ito sa loob ng 30 buwan, kabilang ang anim na buwang moratorium kung saan walang kailangang bayaran at walang ipapataw na multa.
- Latest
