Beripikasyon ng mga balota, target ng Comelec hanggang sa Abril 20
MANILA, Philippines — Target ng Commission on Elections (Comelec) na matapos ang isinasagawang beripikasyon ng mga balota hanggang sa Abril 20 o 21.
Ayon kay Comelec Chairman George Erwin Garcia, uunahin nilang beripikahin ang mga balota para sa malalayong lugar.
Pagsapit naman aniya ng Abril 15 hanggang 20 ay mga balota sa malalapit na lugar, kabilang ang Metro Manila.
Ani Garcia, ang proseso ng beripikasyon ng mga balota ay mayroong dalawang estado, kabilang dito ang manual verification na isinasagawa ng kanilang mga personnel at ang beripikasyon na isinasagawa naman ng mga makina.
Matatandaang sa ngayon ay nakapokus na ang Comelec sa ballot verification matapos na makumpleto ang ballot printing noong nakaraang linggo.
Samantala, sinabi rin ni Garcia na ang distribusyon ng mga balota na natapos nang iberipika ay magsisimula sa ikalawang linggo ng Abril.
Ang distribusyon naman umano ng mga voter information sheets (VIS) sa buong bansa, kung saan nakalagay ang pangalan ng mga botante, detalye ng mga presinto, mga paalala sa halalan at listahan ng mga kandidato para sa national at local elections, ay isasagawa ng poll body mula sa Abril 1 hanggang 30.
- Latest
