CIDG iniimbestigahan ex-PNP chief na konektado kay Guo

MANILA, Philippines — Iniimbestigahan na ng Criminal Investigation Detection Group (CIDG) ang  alegasyon na isang dating hepe ng Philippine National Police (PNP) ang may kaugnayan kay dismissed Bamban, Tarlac Mayor Alice Guo.

Sa pahayag na inilabas ni CIDG director, PMaj. Gen. Leo Francisco, malalim na pagsisiyasat ang kanilang ginagawa sa isyu dahil hindi biro ang pahayag ni  Philippine Amusement and Gaming Corporation (PAGCOR) Ret. Gen. Raul Villanueva na isang dating PNP chief ang tumulong upang makalabas ng bansa si Guo at tumanggap ng monthly payola.

“We are committed to thoroughly investigating these allegations to determine if there is any basis for the accusations against the former PNP Chief. Our primary objective is to validate the statements made by Gen. Raul Villanueva, and if supported by credible evidence, we will not hesitate to file appropriate charges against those involved,” ani Francisco.

Ani Francisco, kailangang malantad ang katotohanan kung kaya nakikipag-ugnayan na sila sa PAGCOR upang makakalap ng mga ebidensiya at testimoniya hinggil sa ugnayan nila Guo at ng dating PNP chief.

Siniguro rin ng CIDG chief sa publiko ang kanilang pagsusumikap na matalupan ang katauhan ng heneral upang mapanagot ito at malinis nila ang imahe ng kapulisan.

Matatandaan na si PNP chief Gen. Rommel Marbil, nabahala rin sa mga alegasyon ni Villanueva at sinabi nitong nakakasira ito ng imahe ‘di lamang ng PNP kundi maging ng pamahalaan.