Councilor Mikey at Senator Tolentino, magkatuwang sa pagtatayo ng MPBs sa Quezon City District 2

MANILA, Philippines — Asahan na ang pagtatayo ng mga multi-purpose buildings (MPBs) sa ikalawang Distrito ng Quezon City dahil na rin sa pagtutulungan nina QC Councilor Fernando Miguel “Mikey” Belmonte at Sen. Francis Tolentino.

Mismong sina Belmonte at Tolentino ang nanguna sa groundbreaking ceremonies para sa pagtatayo ng tatlong MPBs na matatagpuan sa 6th Alley sa Brgy. Batasan Hills, Naski sa Brgy. Bagong Silangan at St. Michael St. sa Brgy. Holy Spirit nitong Martes.

Nabatid na si Belmonte, sa pakikipag-partner kay Tolentino, ang siya ring mangunguna sa konstruksiyon ng pito pang MPBs sa Veterans, Brgy. Bagong Silangan; Area B sa Brgy. Payatas; Pilot Drive sa Brgy. Commonwealth; Kalayaan sa Brgy. Batasan Hills at Samonte sa Brgy. Holy Spirit.

Kaugnay nito, nagpahayag ng paniniwala si Belmonte na ang MPBs ang puso ng isang komunidad.

“These are key investments that we must make for our constituents. While they function as an extension of the city and the barangay government to deliver their respective services, these also function as strategic venues for income generating activities of our micro enterprises,” anang konsehal.

Dagdag pa ni Belmonte, ang MPBs ay makapagbibigay rin ng isang ligtas at kumportableng venue upang magtipon at palakasin ang governance ng mga homeowners’ association, senior citizens associations at iba pang people’s organizations.

Aniya, “MPBs as social infrastructure will always play a pivotal role in empowering and building sustainable communities.”