DMW online systems, nadale ng ‘ransomware attack’
MANILA, Philippines — Kinumpirma kahapon ng pamunuan ng Department of Migrant Workers (DMW) na nabiktima ng ‘ransomware attack’ ang kanilang online systems.
Tiniyak naman ng DMW na sa pamamagitan ng kanilang Management Information Technology System, ay kaagad silang nagsagawa ng pre-emptive measures upang protektahan ang mga datos at impormasyon ng mga OFWs.
Kabilang na anila dito ang pag-offline sa kanilang sistema.
Habang pinagsusumikapan naman ng DMW na maibalik ang online systems, pansamantala muna umanong hindi magagamit ang electronic o online systems na nag-i-isyu ng OECs/OFW passes, OFW information sheets at iba pang online services.
“As a result of a ransomware attack on DMW online systems, the Department through its Management Information Technology System had to take preemptive measures to protect OFW data and information, such as taking the systems offline,” anang DMW.
Tiniyak naman ng DMW na ang databases na naglalaman ng mga OFW data ay hindi naapektuhan ng pag-atake.
Kasalukuyan na rin umanong nakikipagtulungan ang DMW sa Department of Information and Communications Technology (DICT) upang maibalik ang online systems at masiguro ang patuloy na proteksiyon ng mga datos at impormasyon ng OFWs.
Nabatid na in-activate na rin ng DMW ang ilang sistema ay proseso na naghahatid ng serbisyo sa mga OFWs.
“The DMW is coordinating with the Bureau of Immigration (BI) and airport authorities to facilitate the smooth departure of OFWs,” anito pa.
- Latest